دعاء حمدان تكتب: يا أرض الناس الطيبين

عشقتك أنا وعشقك مكتوب على الجبين
لا فى يوم محاه الزمن ولا عفره غبار السنين
نيلك خضارك مرسومين
على وش طفلة صغيرة ضحكت عيونها تفرح القلب الحزين
يا أرض الناس الطيبين
عشقتك بناسك وبأيديا ماسك حبات رمل معطرين
وحبات عينيا مفتحين تحرس جوامعك تحرس كنايسك
فى قلب واحد متجمعين من كل مله وكل دين
يا أرض أبويا وأرض جدى أنا ليا مين
فى شدتى يهون عليا ومن عينيا يمسح لى دمعتين؟
شايفك عروسة فى توب زفافك متكحلة العينين
حزنك وفرحك فوق كتافك وراضية فى الحالتين
ولمحت بطرف عين فلاح بيزرع نخيلها
سألته اشمعنى هى قالى أتربيت فى خيرها
وهناك صياد بمركب شباكه فى قلب نيلها
رزقه ورزق عياله بدعوة صبح منها
والسر فيها مش فى غيرها
إننا بنحن ليها مهما الزمن زادت قساوته
إن طعم المر فى حلقنا بردو بنحس بحلاوته
ومهما تدور بينا السنين هيجى دور مستنين
نرجع لها نشتاق لها وتشتاق لينا أرضها