خالد منصور يكتب: حكايتى مع "الرخامة"

فى يوم رخم جدًّا وفى ساعة رخمة جدًّا كانت الدنيا رخمة جدًّا، كنت فاتح الفيس بوك اللى كان رخم جدًّا، لقيت واحد صاحبى رخم جدًّا واقف تحت البيت بينادى علىّ.

ومما لا شك فيه (إيه الكلمة الرخمة جدًّا دى) حضرتك وأنت تقرأ كلامى ده بتقول فى سرك مين الكاتب الرخم ابن الـ....، قبل ما تكمل الشتيمة أحب أقولك الله يسامحك.

وعلشان شتمتنى هحكيلك بقى وأمرك لله، إيه حكاية بحر الرخامة اللى أنا غرقان فيه ده؟

أصل الحكاية إنى وأنا بفكر اكتشفت أن الحياة فى البلد دى ملهاش أى تلاتين لازمة، يعنى زى ما تقول عايشين فى دايرة مفرغة كبيـــــــرة جدًّا لحد ما الملل بقى بياكل فينا، والفراغ والملل اللى بتكلم عنهم هنا مش من قِلة الحاجات اللى الواحد فينا بيعملها فى يومه، بالعكس الواحد فينا بيعمل مليون ألف حاجة فى اليوم ومع ذلك بيحس إنه زهقان وحاسس إن حياته كلها بتتلخص فى كام كلمة "وإيه يعنى... عادى".

مثلاً: تخرج تتمشى فى الشارع وتاكل شوية لب "وإيه يعنى... عادى"، تتفرج على فيلم حلو وإنت فى إيدك كيس فشار "وإيه يعنى... عادى"، تنزل تطحن نفسك شغل وترجع آخر الليل ميت من التعب "وإيه يعنى... عادى"، تفتح الفيس أو تويتر وتفضل ترغى لحد الصبح مع أصحابك "وإيه يعنى... عادى"، تروح تقعد على الكورنيش وتفضل تسرح وتقلب فى درج الذكريات اللى فى دماغك "وإيه يعنى... عادى"، تتفرج على فيلم مش تمام وبعدها تعمل حاجة مش تمام يصحبها الندم "وإيه يعنى... عادى"، تنزل تلعب أى لعبة بتحبها شوية فى النادى أو حتى فى الشارع "وإيه يعنى... عادى"، تروح القهوة تضيع كام ساعة هناك "وإيه يعنى... عادى"، تخرج مع النص التانى الحلو تتمشوا فى أى مكان "وإيه يعنى... عادى".

يعنى الخلاصة إننا ممكن كده نقول على كل حاجة بنعملها "وإيه يعنى... عادى"، لأن كل اللى بنعمله تقريبًا فى الحياة حاجات ليها تأثير لحظى علينا، أو بمعنى تانى، حاجات بتكون متعتها فى وقتها وبتروح بمجرد ما بتنتهى، حاجات بنفضل نجرى وراها معتقدين إنها هتحقق لنا السعادة وهتملى حياتنا، أو عند بعض الناس حاجات بتضيع وقت وخلاص بدل ما الواحد فاضى!!

جايز نكون محتاجين إننا نخرج ونتفسح، ومحتاجين الفيس بوك وتويتر، ومحتاجين القهوة والكورنيش، ومحتاجين السينما والمسرح، ومحتاجين ممارسة الرياضة، بس محتاجينها كتفاصيل فرعية فى حياتنا.

لكن اللى إحنا محتاجينه أكتر وبشكل أساسى هو مشروع قومى.

مشروع قومى نسانده ونقف وراه، مشروع قومى نشغل كل تفكيرنا بيه وعليه، مشروع قومى يشغّلنا ونشغّله، مشروع قومه نلاقى نفسنا فيه ويلاقى نفسه فينا، مشروع قومى نتوحد كلنا وراه ونجتهد علشان ينجح بينا، مشروع قومى ينقلنا وينقل البلد كلها لقدام، مشروع قومى عظيم زى قناة السويس وزى السد العالى، محتاجين مشروع قومى لأنه مش هيكون مجرد مشروع والسلام، هيكون فكرة، حلم، مشروع.

من حقنا نفكر ونحلم ونتعب وتطلع عينينا.

محتاجين الفرصة، وأكيد، أكيد.... هنكون.