سامح لطف الله يكتب: نوَّرت بورتو طرة

فينك يا راجل بقى
طال انتظارنا ليك
مع قرار حبسهم
ملايين بتشكر فيك
طالع علينا جنابه
ظابط كلامه وشيك
كأنه جايب لنا
حمام ومحشى فريك
***
شهور وعدت بنا
وكل يوم نستنى
إمتى جنابه يطب
ويسيب قصور الجنة
ويشرف عنابر طرة
ويعيش شوية مكاننا
قرص الناموس يروشه
وكفاية حتى الزنة
***
متزعلش منا يا ريس
هتلاقى باقى الشلة
صفوت وعزمى وجيمى
وكمان فيه واحد فله
عز بجلالة قدره
وخمورجى شارب حله
وسرور دا زى العسل
فى الجلسة هتتسلى
جلساته كانت نكت
إرفع ايديك يله
***
يا ما حبست البشر
ادخل معاهم شوف
بياكلوا فول بالحصى
كما بياكلوا خروف
وحاجات كده تقرفك
اظلط يا عم وزوف
لا طيارات تخدمك
ولا أكل جاى ملفوف
حاجة من ظلمك لنا
ما تدوق يا خى وشوف
بإيه يفيد الندم
تلطم وشوش بكفوف