يا شارع الظلم بشويش
لملم عناوينك
عنوان ورا التانى
آن الأوان أبتدى
أجمع ف أحزانى
إطوى رصيفك تحت رجل شهيد
يحلم بيوم المخاض
يدعى بلغة الضاد
يارب قوينى ياعالم بأحوالى
تطلع خيوط الفجر ع المحروسة
خيط ورا التانى
يا شارع الظلم بشويش
لملم عناوينك
وبلاش تعافر
إمسح أثار الدم ع الاسفلت
الدم ده دمى
إفتح عيون سجانك النعـسان
متـشيلوش همى
همى أنا شايله
لما إنكسر ف إيدية
عقرب ساعة السجان
من يومها ما سألتوش
ولا هو طمنى
تحكى الولاد عنى
كان يوم معدى من هنا
صلى هنا إتوضى هنا
قابل حبـيـبته هنا
توصل نسايم عشـقهم ولحد زنزانتى
ترسم جناح طائر على حيطانها
بـيغنى حرية
هوّن علىَّ ساعات الظلم والضلمة
ياشارع الظلم بشويش
لملم عناوينك
عنوان ورا عنوان
لملم ف أسماء الطغاه
فرعون وجند همان
وكـهنة المعبد
إجمع كـرابـيج العسـس والبصاصين
من ضهر جدى
كرباج ورا كرباج
لكن أمانة بالهدوء بشويش عليه
ما تـفزعوش م النوم
بالعافية قلبه إرتاح
من فزعة العسكر
م النسر والدبورة
م السخرة ضهره إنحنى
ف الأصل والصورة
تـشهد عليه القـنال
والجلابـية الدايـبة
من شيل الهموم والفاس
طول عمره عاش منداس
يا شارع الظلم بشويش
لملم عناوينك
امن مركزى
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة