سيد أحمد الهمشرى يكتب: سيد قراره وقع

سيد قراره وقع سموا معايا عليــــــــــه
وهاتوا أم الخلول بالمبخرة ترقيــــــــــه
غلبت أقوله بلاش الغدر والتكويــــــــش
مسألش فيّه وعمل اللى مزاجه فيــــــــه
...
سيد قراره غلط علشان مصدقنيــــــــش
وفى كل جلسة وقف ضدى ومكلمنيـــش
وعمل بدقنه وصى على كل أحلامـــــى
كوش على التورتة واستعبط مدوقنيـــش
...
سيد قراره دخل فى المجلسين طمعـــــان
ومد إيده يكوش على الرياسه كمــــــــان
ومد إيده وكلفت لجنة الدستــــــــــــــــور
العسكرى كعبلة خلاه يتوه تواهــــــــــان
...
العسكرى من زمان حط فى طريقه كمين
وحط له فى الكمين ضابط كبير وأميــــن
اتارى سيد قراره من زمان مخــــــــدوع
ورخصته أصلها ملغية من شهريــــــــــن
...

سيد قراره غشيم دخل جديد فى الكــــــار
وقع مع العسكرى والعسكرى مكـــــــــار
إداله رخصة قياده ختمها ممســــــــــــوح
والنسر عند اللزوم ساب البطاقة وطـــــار
...
سيد قراره وقع بكره ياخد غيرهـــــــــــــا
طول ما الجماعة كده بتحط مناخيرهـــــا !
مالها ومال السياسة ودوشة الأحــــــزاب؟
بكره تشوف اللى عمره ماكان فى تفكيرها
...