"رجعوا الفلول" قصيدة جديدة للشاعر سعيد شحاتة

رجعوا الفُلول يا مصر وبعُوده
واتساوى فيكى السّبْع والدّوده
لجّم حصانك هجّامين الدّور
واتشلّ نخلك فى السنه السّوده

*****
طعمك بشر حامض
دُقت الكلام.... طلع الكلام غامض
يا مبعترانى على السكك صبّار
لسّه الحمار على سكّتك صامد

*****
الثوره هاجت... وقفنا ننادى بالعزّه
وزرعنا راية الكرامه ف لحظة اللذه
زلزلنا عرش الدّب فى بلاده
حرّك ولاده وضرب ثورتنا من غزّه

*****
يا وطن .... للخلف دُرْ
طعم ريح البحر مالح
وانتصار الصمت مُر

*****
رجعوا الفلول والدمّ فى ايديهم
رافعين صنمهم فوق طوابيهم
راجعين بيتهجوكى من غير صوت
وبيزرعوا التوابيت فى واديهم

*****
رجع اللى باعك لليهود والدّون
رجع القمرتى و"مرضعة فرعون"
رجع اللى داس الحلم جوّانا
واغتال مدانا وغيّر المضمون

*****
يا وطن .... للخلف عود
واوعى تفرد خيط وجودك
للى كارهين الوجود

*****
هتبيع بكام النّوبه يا موالى
عبّوا المخالى ورخّصوا الغالى
هتبيعنا امتى وفين ومين سِيدك
وازّاى هيُدْخُل عبيدك قاعة الوالى

*****
الثوره قامت ونامت والكلاب صاحيين
رافعين ديولهم وكاتمين النباح فى الطين
نزل القمر للملايكه يوزّع الشربات
إبليس وقف ع النواصى يجهّز التّنين

*****
يا وطن .... للخلف بيتك
الوشوش فى الثوره تاهت
وانت تُهت ف جلاّبيتك

*****
مهرك ما عادش الدمّ والشهداء
ولا عادش اسم كبير من الأسماء
مهرك صبح أرواح بتتوضّى
وبلاد دهب .... وحوارى من فضّه
وعباد شداد .... وإمامه فى الإسراء

*****
مهرك ما عادش رصاص ولا حجاره
ولا ناس بتؤمر ناس بصفّاره
مهرك صبح فرسان ونيل شبعان
ووشوش بتنزف عشق فى الغاره

*****
يا وطن .... للخلف روّح
الشهيد فى الجنّه ساكت
والجبان واقف يشوّح

*****
الثوره قامت سبّبت زلزال
نامت ومصر اتلفّعت بشوال
رجعوا الفلول... وقف الغلابه ذهول
قفلوا الستاره بـ "عودة الأندال"

*****
رجع الفلول واتمكّن الأغاوات
رقص الديابه ورقّصوا القنوات
وقف المنافق يمدح السافل
والثوره صارت كلمه ع الأفيشات

*****
وطنى.... ما عادش
النيل.... ما عادش
النور وفرْح الدّور
................. ما عادش
فاتت دقيقه ولسّه طيف روحك
......................... على المخاليق ما فاتش

وطنى.... ما عادش
وطنك.... ما عادش
صوتك على الأفلاك .... ما عادش
ضحك الملاك بالليل.... ما عادش
الورد ع الشبّاك.... ما عادش
همس البلابل فى الفضا
........................ برضك ما عادش
النيل.... ما عادش
النور وفرْح الدّور
................... ما عادش
والحلم فى عيون الطيور..... لسّاه ما ماتش
*****

يا ام الشهيد ... يا قلب متألّم
ابنك وقف للظلم واتكلّم
واحنا اللى قمنا معاه ما كمّلناش
وطلعنا دُون ورقَصنا ع السلّم