نصر فتحى اللوزى: يكتب: يا خوفى

يا خوفى منك يازمن
حيرتنى
وأنا فى اصعب المحن
أروح يمين ؟
يرجع لون السواد
اللى عشته من سنين
والا اروح شمال
ويعود الالم والانين
ليه كدا يازمن ؟
لامتى هتسيبنى فى حيرتى
وخوفى هو سيرتى
انا خايف عليك ياوطن
***
ياخوفى منك يازمن ياخوفى
خايف يضيع اسمى
خايف تتبعتر حروفى
وارجع فى عز النهار
اشيل فانوس
اسأل عن الحقيقة
اللى تحمى ظروفى
آه منك آه ياخوفى
***
ياخوفى منك يازمن
ليه دايما انت مغلبنى
اناديك تبص لى
ولا تكلمنى
اطلع من حفره
واقول هى دى للخير نفره
توقعنى تانى فى دحديره
انا ماصدقت اشوف ضحتك
تقلبها تانى فى وشى تكشيره
ليه انت معذبنى ؟
انام فى حضنك تكسرنى
ياخوفى ترجع تانى جوايا تسجنى
***
ياخوفى منك يازمن
ترسم كلمة خوف على باب السكن
تاخدنى وأنا عطشان
وقلبى بيك لشمس بكره ولهان
وترجعنى تانى لطريق طويل
وقلبى بالامل عليل
ياخوفى ترجعنى تانى لرحلة النسيان
***
ياخوفى منك يازمن
انا عايشه
الأمل ضفيرة حبيبتى
من ضوء القمر انا ضفرته
من نسيج خيوط الشمس
أنا نسجته
وحلم قلبى بيتمناه
فيك ياوطن انا عيشته
من آلاف السنين
تاريخك انا سطرته
على جدران المعابد
أنا حفرته
اول حضارة للعالم
انا علمته
اوعى ترجعنى تانى
لخوف انا بايديه خنقته
***
ياخوفى منك يازمن
وآه منك يازمن
قلبى سهران ليالى
يرسم بالورود آمالى
أنا قليى
خايف على الوطن
ساعدنى يازمن
سامحنى يازمن
ياربى
نور طريقى اخرجنى من المحن
اعيش فيه يعيش جوايا
يازمن
يجرى فى دمنا
فى ليلنا فى صبحنا
اسمى رسمى جسمى
منسوج منك ياوطن
ياخوفى منك يازمن
***