عمرو عطية يكتب: أيها المرشحون.. بنِيَتِكُم تُرْزَقون!!

الإسلاميون قالوا لنا: قولوا نعم على التعديلات الدستورية اللى من ضمنها "ماينفعش المرشح للرئاسة يكون معاه جنسية غير مصرية أو أبوه أو أمه يكونوا معاهم جنسية أجنبية"؛ عشان مايوصلهاش د/ أحمد زويل اللى كان مرشح نفسه للرياسة فى البداية؛ فيقوم لنفس السبب يطير منها الشيخ حازم أبو إسماعيل، سواء صدقا أو كذبا!

يقولولنا: قولوا نعم على التعديلات الدستورية اللى من ضمنها (ماينفعش حد يطعن على قرارات اللجنة العليا للانتخابات)، ولما ييجى قرارها بأن حازم أبو إسماعيل أمه أمريكية (سواء كذبا أو حقيقة)، يقوموا يطعنوا على قرارها ويطالبوا بإلغاء المادة 28 اللى وافقوا عليها فى البداية!!!

يقولوا للمرشحين الإسلاميين (حازم وأبو الفتوح والعوا): اتحدوا فيما بينكم على مرشح إسلامى واحد عشان مانشتتش الأصوات وواحد منكم تجتمع عليه كل الأصوات ويكسب، يقوم التلاتة يرفضوا، ولسان حالهم يقول: أنا وبس؛ يقوم التلاتة يخسروا ويطلعوا بره ولا واحد فيهم يكسب!

يقولوا للمرشحين الثوريين (أبو الفتوح وحمدين) أغلب أصوات الثوار معاكم، فياريت تتحدوا على واحد فيكم عشان تكسبوا ضد مرشح الفلول؛ فيقوموا يرفضوا؛ فالاتنين يطلعوا بره وماحدش فيهم يكسب!!!

أحمد شفيق ومحمد مرسى، كل واحد فيهم فى حملته الانتخابية وحواراته الرسمية يقول بكل غرور عن نفسه: هنجح من أول جولة ومن غير إعادة؛ فيقوم هما الاتنين يتقابلوا قصاد بعض فى جولة الإعادة!!!

يا ترى بعد كل ده، هل نِية كل واحد فيهم الوصول للحكم عشان مصلحة وإصلاح البلد؟! ولا عشان مصلحة نفسه ؟؟!!! يا ريت كل واحد يفتش عن نيته الحقيقية بينه وبين ربنا؛ عشان .. بِنِيَتِكُم تُرْزَقون!!!