نصر فتحى اللوزى يكتب: لا تكونى حزينة

اسمحيلى يامه من غير زعل ولا عتاب
أنا بأسألك هو ميزان العدل فيكى غاب ؟
ولا الميزان تاه عن طريق الحق وانقلب
قلبى يامه سألنى قوللى ليه وايه السبب
طب هقوله ايه عن كفه كان فيها رطب
التانية كان نور تاريخك مجد فى الكتب
من خوف قلبى عليكى عايش فى عذاب
احنا من خوفنا عليكى الشعر فينا شاب
انتى فى عنينا ليكى مكانة فوق السحاب
ايادينا ممدودة الكهل فى حب البنا شباب
احنا اللى غيرنا الحزن للفرحة فى سينا
اوعدك امسح همومك لا تكونى حزينه
الموج هيعزف غنوة الامل ليكى بادينا
كلنا بيكى هنجدف سوا للامان ياسفينه
قلوبنا فيكى زهور طيور ياأحلى جنينه
حبك فى دمنا جوه الجفون الكحل لعنينا
احنا عايشين ليكى وانتى عايشة فينا
هيرجع لنا بيكى ميزان عدالة اجتماعية
وكرامة ابدا ماتغيب وتعلى راية الحرية
وعيش من ارضنا بايدين ولادك الفتية
التاريخ هيسطر صفحة جديدة فى كتاب
سيدنا يوسف اول محاسب علم الحساب
انتى يامه منارة والعالم وراكى فى ركاب
ولادك علماء اعلام للعالم فى المنتديات
طب هندسة كيميا اقمار فوق الفضائيات
أنا آسف يامه لما سألتك عن الميزان
اوعدك كلنا للمصنع بعيد عن الميدان
الساقية ترجع تانى تغنى مع الدوران
وهمتنا لارضنا الخضرا تكون فى العالى
ومجدك فى الكفة التانية من قلبى موالى
واللى فينا هيكون له عشم فى مطالب
انتاجنا يرد عليه بالخير يكون غالب
أنا آسف يامه آسف مش هسألك تانى
اللى عايزنى دوران المكن هو عنوانى
***