نصر فتحى اللوزى يكتب: رسالة إلى سيادة الرئيس

ياسلام
وأنت واقف فى الميدان
قلت كلام
ياسلام على الكلام
فكرنى بخير زمان
ساعتها اتحسست بطنى
قلت وداعا يا حرمان
خلاص مش هبات ليلة
جعان
حسيت إنك واحد مننا
دقت المر زينا
بتتمنى لينا أيام سعيدة
نعيشها فى هنا
فى المرتب فى المعاش
اللى بيودع جيوبى
لنص الشهر ما يستناش
فى العلاج
اللى ما أصبحشى سياج
دا المرض بقى علينا سهل
من علاج
حول الشاب لكهل
***
ياسلام
وأنت بتقول الكلام
عن الأمن والأمان
حلمت وأنا صاحى
إنى هرجع تانى من تعبى
من غير خوف أنام
قلت خلاص مفيش خوف
كمان مفيش طوابير
مفيش وقوف
خلاص هتنتهى زحمة الصفوف
وهستغل كل وقتى فى العمل
مع آلتى اللى وحشتنى
مفيش كسل
***
ياسلام
على الكلام
لما يتحول لعمل
والنفوس تبقى راضية
من غير كلل
العرق أحسن علاج للملل
لا أبدا مش هيبقى فيه ملل
التصدير هيبقى هو البطل
***
ياسلام
على الكلام
منه حسيت إنى بقيت
فى بلدى سيد
والقرار نابع مننا
فى حب مصر من غير تردد
شفت فى كلامك
نسايم الحرية
حسيت من تصريحاتك
أسمى معانى الوطنية
كان كلامك
أمل وردى خارج فوق لسانك
كنت فارس
وعدتنا للمحروسة حارس
كان لسانك
خيال فوق حصانك
اللى بيه هتحقق
ميزان عدالة اجتماعية
***
ياسلام
على الكلام
بصراحة حسيت
بكرامتى المصرية
رجعتلى تانى الغالية هوية
حسيت إنى تانى
لبست تاج طار بروحى
فوق السحاب
وأعلى كمان شوية
الكلام
كان كتير
كان كبير
***
ياسلام
على الكلام
لما يتحول بصدق
لما يحضن الفكر السلوك
والسلوك يبقى للفكرعمل
يبقى للإنتاج صكوك
نفسى أشوف منك جواب
تبنى جيل بتعاليم الكتاب
***
ياسلام
على الكلام
لما يترجم الأمل بالعمل
وننسج من خيوط الشمس
مستقبل مصر
ويزول الغمام
ساعتها هحس
إنه كان مش كلام
كان خطة أمل
واتحول الكلام لعمل
وأنت لك مننا
على صدق الكلام
تعظيم سلام
***