تعالى نلعب عسكر وثوراجية
انت العسكرى
وأنا الثورجى
يا عسكرى يا أبو بندقية
تعالى موت البنت دية
البنت بتهتف
يا عسكرى يافنجرى
ده مش دورك يا مفترى
اجرى وراها يا دفعة انت وهو
هاتوها جروها ارموها جوه
اجرى بسرعة يا اختى وسطينا
اجرى المولى يحميكى ويحمينا
يا باشا مسكتها
ومن شعرها جرجرتها
وبالبيادة فعصتها
جدع يا دفعة انت تمام
هاتخد منى أحلى وسام
يالا قوام عليك بالباقى
ده عمل وطنى وانت فدائى
يا ثوار.. يا ثوار
اختنا فى الأرض
وانكشف العرض
تعالى يا ست البنات
فداكى ألف شب مات
وعيون انطفى نورها
وعيون لسه نورها
بيزرع الخوف فى عيون كلاب
باعوا الوطن
انطقى يا نفوس خرسا
انتى ما شبعتيش سكات
كام شب اندفن
وانتى ساكنة فى شرنقة الثبات
اضرب قنابل وسط الجموع
تعمل دمامل تسيل دموع
القنابل ترجعلك ياعسكرى
من واد همام مش بلطجى
ويتقدم الثورجى
خطوة.. خطوة
دمعة.. دمعة
قطرة.. قطرة
دماء بريئة وطهرة
تنور مليون شمعة
العسكرى عقله يطيش
يضرب بالرصاص والخراطيش
اضرب يا دفعة
لازم يموتوا وإحنا نعيش
أموت أموت ما يهمنيش
المهم بلدى أمى تعيش
يا ثوراجية.. يا ثوراجية
شايف شوية جاين عليا
معرفش عسكر ولا داخلية ولا بلطجية
شكل واحد
لون واحد
هدف واحد
هى دى القضية
لازم تموت الثوراجية
لازم تموت الثوراجية
واللعبة لسه مستمرة
يا ترى مين ينتصر
العسكر ولا الثوراجية
ولا الكل يخسر
وتموت القضية
صورة أرشيفية
مشاركة
اضف تعليقاً واقرأ تعليقات القراء
مشاركة
