هند أحمد تكتب: أرجووك ماتفتيش

فى الأيام دى مطلوب من حضرتك إنك تسكت خالص وماتتكلمش أساسا.

أيوة يا صديقى العزيز من الآن فصاعدا لا تفتح فمك نهائيا.

ولا تدل برأيك فيما يحدث حولك وخصوصا فى السياسة، كفاية بقى دا الفتاوى نازلة ترف علينا عمال على بطال.

منذ يومين أفتى قيادى سلفى أن من لا ينتخب الإخوان سوف تقرصه الثعابين فى قبره 4 سنوات.

لا بقى هى لو فيها ثعابين يبقى من بكرة هنتخب الإخوان، إيوة يا عم أنا بخاف دا بيقولك ثعابين وأربع سنوات كمان يعنى الموضوع أكبر مننا.

وهوب كمان ماعداش يوم تانى وتطلع فتوى أخرى من خيرت الشاطر، تصف كل من ينتقد الإخوان بأنه من شياطين الإنس، طيب بالنسبة بقى أن مصر كلها طلعت شياطين نجيب السعودية مثلا تقرى علينا.

طيب ماشى يا سيدى كل دا تمام وتسألنى أقولك شغال ياصديقى
لكن كله كووم وفتوى لشيخ جليل بأن من يعترض على الإخوان يعتبر من قوم لوط!.. دى كووم تانى خالص.

بيقولك قوم لوط ياصديقى يعنى بالصلاة عالنبى كدا ما فيهاش هزار، شوفت بقى كلامك عن السياسة وصلنا لأيه؟

شوفت أخرتها أهو بقينا من قوم لوط، يعنى أوعى بقى تنتقد من هنا ورايح.

دا لو كان ليك رأى يعنى وبيلح عليك أوى، يبقى تتكلم فى أى حاجة ماتزعلش حد منك.

آه يا صديقى دا الواحد لا يملك إلا سمعته بعد سمعة مصر.

دى كل حاجة ممكن نعديها ونقول الكلمة مابتلزقش، لكن قوم لوط دى حاجة تانية خالص، لو لزقت مابتطلعش وهنلاقى الموضوع وسع وكبر مننا واحنا مش ناقصين الأيام دى الله يباركلكم.

لكن فى الحقيقة وبصراحة شديدة أنا كنت سعيدة جدا عندما وجدت أن جميع الكتاب فى جميع الجرائد يسخرون من تصريح شيخنا الجليل، آه طبعا جليل دا بيقول على اللى بينتقده قوم لوط أومال لو انتقدته هو شخصيا ممكن يتقال إيه، شوف أنت بقى.. يبقى جليل ولا مش جليل، طبعا جليل وجليل وكمان واحدة جليل بس فى الحقيقة كمان مرة أنا مبسوطة بشخينا الجليل دا لأنه جعلنى أكتب مقال ساخر بحت.

وأنا لا أكتب مقالات ساخرة ولكنه جعلنى اكتشف فى نفسى موهبة جديدة فشكرا لك صديقى القارئ، ما تقلقوش أكيد مش هشكر شيخنا الجليل.

ويلا بينا بقى نلم ثعابينا وشياطينا والقوم بتاعنا ونمشى من هنا ما هو ماحدش عالم بكرة هتطلع فتوى تانى تقول إيه.

لكــى الله يا مصر.