ثلاث قصائد إهداء لحمدين صباحى.. شعر/ سعيد حامد شحاتة

1- صباح الخير يا ريّس مصر
******
صباح الخير يا صبّاحى وصباح النصر
صباحك يشبه الأحلام
ويشبهنا ف صلاة العصر
صباح الخير
يا غنوة طير
يا حضن بيتفتح للغير
يا رايه بتنفرد ع القصر
صباح الورد واللولى
وصباح العمده والخولى
وصباح مساكين بيدعولى
وصباح النور يا ريّس مصر

صباح الخير يا صبّاحى وصباحك ضىّ
صباحك ضحكة الحنّه لبنات الحىّ
صباحك عزه وبطوله
وبلد فى المرتبه الأولى
وإيدين بالهمّه مغسوله
ونشيد عامل وراكية شيّ

صباحك ضىّ يا محارب جيوش الدّون
يا قافل قلبك الساكت
وفاتح قلبك المفتون
صباح الورد يا معاند
صباح الفُل يا مساند فقيرك بالمدد والعون
صباحك نصر يا معذب جنود فرعون

صباحك تاج على كفاحى ومدد وشعار
صباح مصنع وطير صاحى وقصيده عيار
صباح تنهيده فلاحى وحصيره ودار
ومستوظف وإصلاحى ومدينه بتتولد فى الغار
صباح النور يا صبّاحى
وهنفرح لو غسلنا العار

صباح الخير وفكيّنا الحصار بالإيد وعدّينا
صباح الخير وبكره يا مصر أول عيد على ايدينا
صباح الخير ولابسينك جديد فى جديد وضمّينا
إيدينا وقلنا هنصمم وصممناكى فى عنينا
صباح الخير عشان خالد
صباح الخير عشان مينا
صباح الخير ومش ممكن نهدّك أو تهدِّينا
صباح الخير وهنجرّب نخوضها بعزم ما فينا
صباح الخير على البناوير
صباح الفرحه فى التحرير
صباح المعركه ف سينا
صباح التوته والتّينه
وصباح الشّحن فى المينا
وصباح صابح وصلّينا
ونوينا نحرَّرِك بالنسر
صباح الخير يا صبّاحى وصباح النصر
صباح الفل يا معافر
يا مؤمن والطريق كافر
يا صامد والمدى مسافر
يا فاتح قلبك الظافر
وشادد كلمك ع الخَصر
صباح الخير و خُدْ بالك
يا ريّس من غلابة مصر


2- ثوار ونازلين ننتخب حمدين
ثوار لآخر نقطه فى الشرايين
ثوار لآخر فرد ع الساحه
ثوار يا فاتح قلبى ع الشطين
ثوار يا بنت النور يا فلاحه
ثوار يا حالف بالزتون والتين
ثوار يا خالق قلبى تفاحه
*****
ثوار يا واحه يا نخل يا تنّين
ثوار يا بنت بنوت يا يوم الدين
يا صدر أم بيبتسم لجنين
ثوار يا خلق يا منتجات الصين
يا عيار بيدبح ضحكة الساكتين
ثوار وواقفين ع السكك صفّين
ثوار وماشيين ع الشطوط نحلم
ثوار ونازلين ننتخب حمدين
******
يا نيل يا جىّ محمّل الأحلام
يا كلمتين فى شفايف الأيتام
حراق طلوع الفجر ع الظالم
مكسور وضهرى هينصلب قدّام
*****
يا نيل... يا هذا الشاهد الصامت
يا نيل... يا عزبه ف تركة المُلاّك
طلعوا العيال والمعركه اتقامت
والأرض واقفه هناك بتستناك
رقصت على الأشواك خيطان الحرف
كل البنات صلّت هنا وصامت
ولوحدى أنا الممنوع هناك م الصرف
*****
للثوره رب وللميدان فرسان
اركب حصانك يا عظيم الشّان
واخلع ملامح عمرك الدبلان وهز الأرض
واعلن على المدنه إن موتك فرض
آن الأوان للورد يتمرد على الأشواك
آن الأوان لبلدنا تتهجّاك
آن الأوان للقلب يفتح باب
والروح تقف تضحك على الشباك
اركب حصانك يا ملاك الروح
مدبوح عشانك والوريد مدبوح
لاهتف وراك وأصرخ بصوت مبحوح
الناس دى ناسك والملايكه معاك
*****
ثوار يا مصر وثورتك إصلاح
ثوار وروحك روح صبايا ملاح
ثوار وناويين نزرعك رايه
ثوار وطالعين ننتخب فلاح




2- ضدّك ومش رافضك ولا بانفيك

طعم الوطن نعناع فى حلق الجياع
صمت الوطن صفصاف على كتافى
يا طير يا رافض سكة الأتباع
قلبى المعافر ع الطريق حافى
*****
واقف وباهتف و(السلاح صاحى)
ضدّك ومش رافضك ولا بانفيك
أنا طالع أدّى الصوت لـ صبّاحى
وف إيدى ورده وبابتسم فى عنيك

اليوم دا يومك يا أم شال أخضر
اليوم دا يوم العزبه والبندر
يوم اللى يقدر يخلقك تانى
ويسيب طيورك تمشى تتغندر


(مرغم عليك يا صبح) فرحان يا نور
أنا أبويا مصرى وجدى كان مأمور
لا قدرت أخون ولا أبيع ولا أتجمّل
ولا قادر أتحمّل وطن مكسور

طلع النهار والفجر شقّ الحيط
والليل وقف للشمس بالوطاويط
طلع اللى عاش للضلمه بسلاحه
طلع اللى عاش للضىّ بالنبابيت

حالف يا مصر عشان عنيكى يمين
مخلوق وطينك غير جميع الطين
حالف يا مصر وواقف أتمايل
شايل ولادى وهانتخب حمدين

الكل مصرى ومصر فى حشانا
يوم العبور حرّكنا أسر البور
ولا فرّقتنا ديار ولا ديانه
عدّينا سورك وانطلقنا نسور
وعنيكى رايه وبنت نعسانه
يا ورد طارح بين حيطان الدور
مبدور وروحى شراع ورمّانه
لو كنت قادر كنت أهِدّ السور
وإن كنت عاجز كنت أقف دانه

يا عَوْرةْ الوطن اللى عرّّوها
مش طمعانين فى العز والسلطان
يا ضحكتى الصافيه اللى غمّوها
يكفينى م الذلّ اللى شُفته نيشان

يكفينى ضحكة قلبك المَهْرى
عاشق وساند بالوجع ضهرى
عاشق وصامد فى الوشوش الدّون
عاشق ودمى على التراب مهرى
طالع وشايلك رايه ف يمينى
والصوت أمانه وصوتى راسمالى
طالع لواحد طينته من طينى
طالع ف ايدى بلادى وعيالى

طالع وباهتف و(السلاح صاحى)
ضدّك ومش رافضك ولا بانفيك
أنا طالع أدّى الصوت لـ صبّاحى
و ف إيدى ورده ومصر ليّا وليك