د.هانى أبو الفتوح يكتب: كدب فى كدب

كل يوم عايشين فى حالة
م الكلام والحكاوى والقوالة
اللى جاى يفتح فتوحوا
واللى قال يفديك بروحوا
واللى أقوالة استحالة
...........................
كله نازل الانتخاب
اللى جاب كشف الحساب
واللى كان عاصى وتاب
واللى كان فى السجن طالع
قلبه مليان حقد والع
يحكى أيام العذاب
واللى خد فى حبوب شباب
لأجل يرجع بعد شيبته
يقول ما شاب
........................
اللى يحلف ميت يمين
إنه شايلِكْ جوة قلبه
وحط صورتِك عالجبين
وإن لما الثورة قامت
كان معاها
بس كان مغلوب لأمره
مستكين
واللى كان ماسك الوزارة
غصب عنه وبات حزين
حتى شوفوا أما أقابل ثورجية
لما يدعوا كان يِرُدْ يقول آمين
.......................
واللى طالع م الليمان
جاى عشان يفتح بيبان
لما عاش فى جماعته حاضر
بس بعد الثورة ثاير
قلبه مليان بالإيمان
اللى كان فى نقابة عايش
يستلم دعم ويوزع
فى المحبة والحنان
جاى بخبرة كبيرة جدا
لَمْ فيها ملاك وطاهر
قَعَّدُوا جنب الشيطان
المهم إنه يعدى
فوقنا راكب عالحصان
واللى عامل نفسه عدل
والعدالة بس صورة للميزان
.......................
والمناضل اللى ناضل
بالخطب ويا الكلام
واللى كان فى الميدان
بالكتير يضرب سلام
لما نور الثورة بان
حتى شوفوا
صورته فوق دبابة واقف
لما كبر بالأدان
إشربى يا مصر يالا
زيى شارب م الكيعان
وأما أقول شكرا شبعت
هيقولولى اشرب كمان
والحقيقة
كله كدب فى كدب لازم
مستخبى و للا بان
الكلام ببلاش يا مصر
يشتريك ويبيع لسان
كله يلعب بالكلام
لأجل يوصل للمكان