د.هانى أبو الفتوح يكتب: شكلها غاوية!!

حابة تجرب كل مكان
عاشقة تدوق طعم البركان
غاوية النار وغاوية حرايق
وأما بْتِطْفَى قوام تدايق
حابة الولعة وغاوية دفاها
وغاوية تبدل نار بهواها
علشان كده ماشية بتتنقل
واللى يْوَلَّعْ فيها الأعقل
والثوار فاهمين مطالبها
إيه يرضيها وإيه يعجبها
الشعارات على كيفك قول
عاوزين نارها تإيد على طول
......................
ولعوها كمان وكمان
كل حريقة من الإيمان
ولع احرق كل مكان
يبقى شعار كلنا هنقول
ولعوها هتطفوها ليه
اللى يحاول اجروا عليه
يالا وحطوا النار فى عنيه
........................
ولع فى محمد محمود
وف ماسبيرو ياكلها الدود
تجرى تِوَلَّع جوه الْمَجْمَّع
فى مجلس وزرا روحها بتطلع
رد القصر العينى وقال
برضو أنا ولعة ويا قتال
جريوا بسرعة بِحِتة نار
ماسكة الولعة فى إيد ثوار
يبقى نولع ولعة قوية
م التحرير للعباسية
إوعى تقوللى كلام خَدَّاع
يالا بسرعة نروح لدفاع
هنحارب فى الجيش وعساكر
وبعد الولعة هنجرى نذاكر
هنولعها فين من تانى
علشان تفضل كده عاجبانى
ولعة فى ولعة ياحلوة يا والعة
خيبة قوية دا روحك طالعة
خيبة وبنقول خيبة ليه
بعد الولعة بيفضل إيه
بيفضل بس رماد ودخان
ودمار ماشى فى كل مكان
وناس بتعانى من الحرمان
بعد مانفقد روح وإيمان
نحصد إيه غير الأحزان!!!