فيسبوك
واتساب
«حصاوى على المقهى مع جاره»
الجار: انت مع مين يا حصاوى؟
حصاوى: أنا معاك. ولّا عايزنى أقوم من جنبك؟.
الجار: قصدى مع مين اللى يمسك الجمهورية؟.
حصاوى: قلت لك بطلت أقرا جرايد.. أصل الجمهورية، زى الأهرام، زى الأخبار، وكلها أخبار ما تسرش.
الجار: انت أكيد مش عايش فى البلد دى.
حصاوى: تحب أسيبها لك وأهاجر بلد تانية؟
الجار: يا ريت.. على الأقل تريّحنى من غبائك.
حصاوى: بس أنا محتار. أصل كل البلاد العربية باعتبرها وطنى الأكبر.
الجار: عظيم. طب تحب تعيش فين؟
حصاوى: فى أى بلد بيشهد الربيع العربى.
الجار: هايل. زى إيه؟
حصاوى: عندك سوريا مثلا
الجار: أشمعنى؟
حصاوى: بيقولوا الأيام دى فيها ثورة، وانتخابات مجلس شعب.
الجار: بس دى فيها مظاهرات، وحوادث سرقة، وقتل، وتفجيرات، وناس بتهاجر.
حصاوى: عادى.. ما إحنا عندنا مظاهرات واعتصامات وحوادث قتل وتفجيرات.
الجار: أنا شاكك فيك. قولى بصراحة كده.. انت مع العسكر؟
حصاوى: أنا باحب أبقى فى السليم.. والعسكر أحسن من الحرامية.
الجار: ما فيش فايدة، وعيك السياسى ناقص.
حصاوى: قصدك تقول إن الحرامية بيكسبوا اكتر م العسكر؟
الجار: بلاش لف ودوران، خليك شجاع واعترف، انت مع دولة عسكرية ولّا مدنية ولّا دينية؟
حصاوى: عايز الحق؟ أنا أفضّل تكون مهلبية.
الجار: نعم؟.. يعنى إيه؟
حصاوى: يعنى كلنا ناكل مهلبية.
الجار: أنت جعان يا حصاوى؟
حصاوى: لا.. شكلى كده.
الجار: انت ممكن تاكل مهلبية لما تقول يا بس. بس لو اخترت صح.
حصاوى: علمنى انت الصح.
الجار: طبعا إحنا مش عايزين رئيس ديكتاتور يحكمنا، ويبقى فرعون زى مبارك.
حصاوى: هو مبارك كان فرعون؟
الجار: طبعا.
حصاوى: والله ما حد قالى ولا فهمنى.
الجار: أدينى فهمتك.
حصاوى: لو أعرف كده من الأول لكنت رحت كل استفتاء وانتخبته.
الجار: نهارك أسود، انت من الفلول يا حصاوى؟.
حصاوى: ولى الفخر. لأن أنا لحم اكتافى من الفول والطعمية.
الجار: فلول يعنى من زمرة الفرعون مبارك.
حصاوى: يا حلولى. . أكن مبارك بنى أهرام زى خوفو؟.
الجار: لأ طبعا.
حصاوى: ولا شق قناة زى قناة السويس؟ ولا عمل صوامع يخزن فيها القمح؟ ولا شجع
العلم والطب والكيميا والفنون والموسيقى والأدب، ولا نظم نهر النيل. ولا. .
الجار: «مقاطعا» حيلك انت بتتكلم على مصر القديمة الفرعونية.
حصاوى: مش انت اللى قلت إن مبارك كان فرعون؟.
الجار: قصدى زى الفراعنة فى ديكتاتوريتهم.
حصاوى: وهى الديكتاتورية تعمل أول وأكبر وأهم حضارة فى تاريخ البشر؟
الجار: انسى تاريخنا القديم كله. دا راح وانتهى.. إحنا فى النهار ده
حصاوى: ولما أنسى التاريخ بتاعنا، أفتكر التاريخ بتاع مين؟
الجار: التاريخ بتاع الرئيس اللى جاى.
حصاوى: أنت هتنتخب عبد المنعم أبوالفتوح؟
الجار: أيوه. إيش عرفك؟
حصاوى: ودا ديمقراطى؟
الجار: مؤكد. لأنه أخوانى سلفى ليبرالى ناصرى يسارى شيوعى وبادعوك إنك تنتخبه.
حصاوى: استنى لما أفكر على مهلى.
الجار : فى ذهنك مرشح أحسن منه؟
حصاوى: بصراحة آه.
الجار : مين هو؟
حصاوى: رمسيس التانى. أصلى نفسى أغنى من غير حد ما يمنعنى.
«الجار يغشى عليه»
