خالد الصاوى: لى الشرف أننى جندى فى حملة المناضل حمدين صباحى

يحاول الفنان خالد الصاوى إقناع الأشخاص الذين يحترمون حمدين صباحى، لكن يرفضون تأييده، لأن فرصة فوزه ضعيفة، فى تغيير رأيهم، وأكد أنه جندى فى حملة المناضل الصلب حمدين صباحى، حيث كتب الصاوى على صفحته الخاصة على موقع الفيس بوك "أغرب حملة رئاسية فى الكون حملة المناضل الصلب حمدين صباحى، وكلى شرف إنى جندى فيها.. كل واحد تقول له حمدين يقولك بابتسامة أخوية نقية: أنا بحترمه على فكرة الراجل ده من زمان، ومصدقه والله، بس أصلى خايف تكون فرصته ضعيفة فهختار فلان!! يا عم، يا ريس، يا أخت، يا باشا، أساحبى".

"أولا استفتاؤك الأعظم هو قلبك، ثانيا شوفه واسمعه واقرأ حملته عشان تتأكد أن قلبك وعقلك مسستمين صح، ثالثا كتلة صغيرة متماسكة أبرك من تجمعات زلاطية مترهلة تتجمع كالقطيع لا كما تتجمع الطليعة..(أيوه يا سيدى إحنا هم دول اللى اسمهم الطليعة، ودى مسئوليتنا التاريخية بعيد عنك!)، وإلا انت ما تعرفش إنه كم من فئة قليلة...؟؟ رابعا مين قالك إن فرص فلان ضعيفة وفرص فلان قوية؟ عندك جهة استطلاع رأى ممكن تديها عقلك؟ خامسا فى الأزمنة الحرجة دى اليوم الواحد بيفرق ١٨٠ درجة طبقا للمتغيرات اللاهثة، سادسا لما تسمع بيانات عن سير اتجاهات الرأى من مرشح، خليك جدع واسمع كل الأطراف، مش طالبة قطيع.. وبغبغان!

سابعا ليه فاكر إن دورك تروح يومها تكتب حمدين وتروح؟ لا يا عزيزى إحنا حملة ملهاش سند إلا ناسها، لا مؤسسات رأسمالية ولا مراكز قوى ونفوذ وراءها، مد ايدك ماتتكسفش وأتعب معانا عشان ننشر احتياجنا الجماعى لرأس حربة لثورتنا اللى بتلعب فى الوقت الضائع من الشوط الأول والنتيجة اثنين واحد لصالحهم، عاوزين قائد يشيل رايتنا ونترصله طوابير من الفجر عشان نحول اختيارنا لحقيقة. ثامنا وأخيرا.. بنشكرك على البقين اللى طالعين من قلبك فى حق حمدين... بس أنت كده بتفحت حملتنا.

حمدين واحد مننا، بيدافع عن حقوق الغالبية مش عن امتيازات الأقلية، وبيقول لنا بوضوح: خذونى واستكملوا ثورتكم، حققوا مطالبكم العادلة الملحة بى، ثم سلموا الراية للشباب وقد مهدنا الأرض لهم، شاركونا هذا المشروع الثورى الديمقراطى.. بالجهد، وبالتنظيم، وبالإصرار".