طارق عليان يكتب: أنا مصـرى

أنا مصـرى
ولا إخوان ولا سلفى
ولا ليبرالى أو علمانى
ولا حتى فصيل تانى
أنا مصـرى
شربت المية من نيلها
ولحم كتافى من خيرها
وعرقى لون سمار الأرض
وبعشـق كـل شيئ فيها
أحب أتمشى ع الكـورنيش
أحب اللمة ف عنيها
وتاخد عقلى أتجنن
بنسمة صيف على خدودها
ويصبح قلبى بوابة على حدودها
أحب الزحمة ف الشارع
وضحكـة طفل تـتكرر
وصوت رفعت ف صحن الجامع الأزهر
يقول للصايم إستـنى كمان خمسة
ومدفع الإفطار ولمة أسرة ع السفرة
أحب الطيـبة جوة الناس
قلوب صافية وضمير صاحى
أنا مصـرى
ولا إخوان ولا سلفى
ولا ليبرالى أو علمانى
ولا حتى فصيل تانى
أنا مسلم
وإخلاصى لرب الكون
ومش للشيخ أو المرشد
ف إسلامنا مفيش كهنوت
ولا واسطة ما بين العبد
ورحمة صاحب الملكوت
أنا مسلم وإسلامى بيمنعنى
أبيع عقلى وأكون أراجوز
وأتشعبط ف شيخ مأجور
يبيع الفتوى بالقطعة
ويصبح لعبة للسلطان
أنا مسلم وإسلامى بيأمرنى
تكون القدوة للصادق
محمد ابن عبد الله
رسول للعالمين رحمة
يكون نبراسى ف الزحمة
أسلم ناصيتى لله
يكون دستورى قرآنى