جمال نور يكتب:لو فكـّرنا نحلم.. نموت

لو فكـّرنا نحلم.. نموت
لو عاندنا..
كل يوم هنتكدّر
لأن كتير علينا الحلم
علشان دى أوامر العسكر
وأصلا إحنا نحلم ليه..!
هو يعنى الحلم متيسّـر..!
وليـه نحلم..؟
مدام الحلم بيْخسّـر
وليـه نخسـر..؟
مدام فيه غيرنا بيفكـّر
ويزرع لينا مايكـْفى
من غيطان القمح والسكر
مع إن عندنا سينا
تكفـّى القارة ونصدّر
هنتعِـب ليه ف نفسينا..!
ونخلـّى الدم يتعكـّـر
وليه نتعب..!
مدام فيه حد يتفضـّل
ويجيب من عنده يكسينا
فلابد إن إحنا نتشكـّـر
ونقول بعِـزم ما فينا
شكرا ليك يا راعينا
جمايلك دى ما تتقدّر
ونجرى عليه نبوس إيده
وعيب إن إحنا نتبطـّـر
ونقولـُـه تحت أمر البيه..
نخاف لجنابـُـه يتوتــّـر
مش هوّ ولىّ نعمتنـا..!
مش ده بيدّينا لقمتنا..!
يبقى ليه هنتكبـّر..!
ونقول لازم يا ناس نحلم..!
ونحلم ليه..؟
ناقصنا إيه..!
م إحنا أهو بنتغندر..!!
وكل حاجة بتجينا
من الأستيكة للبراية للدفترْ
من السبحة للسجادة
للإبرة للدبوس للترتر
ويقولـّك نبنى كام مصنع.. !
ونصنع ليـه..!
دى حتى هدومنا تتعفـّر..!
بلاش من دوْشة المصنع..!
منـُّه.. ودّانـّـا هتصَـفـّـر
ومنه نلوّث البيئة
ما نصون صحتنا ونوفــّر.. !
يبقى ننام ونشبع نوم..
ونقوم ليه الصبح ونبدّر..!
ما نصحى الضهر..
عشان نصحى..
نلاقى فطارنا متحضـّر
بس يعنى لما ننام..
طبيعى.. إننا نحلم..
ولو نحلم..
هيفتكرونا بنهزّر
عشان ممنوع علينا الحلم..!
يبقى ضرورى إننا نسهر
ولو نسهر..
مفيش ولا حاجة تشغـلنا..
غير إننا نخلـّف
ولو خلـّفنا..
هتبقى الكارثة.. راح نكتر
واحد هيقولـّى م احنا كتير
أقولـُه لأ.. هنبقى أكتر
وهتبقى الخِلفة زخـّات..
وكأن الدنيا بتمطـّر
طاب إيه الحل يا مفتـّح..!
أقولـّك.. بس تستحمل..؟
ليعلى الضغط والسكر..!
لا تنام بدرى ولا تسهر..
ولا تتعب ولا تفكـّر
عيش على هامش السيرة
واشرب برميلين بيرة
وتبقى تملـّى متخدّر
هتنسى كل شىء حواليك
وحتى اسمَـك.. مش هتتذكـّر
وجايز تبقى ف الضايع
وتـُقف ف الحارة بالأندر
بس هتبقى ماتساويش سحتوت
فى العصر اللى مش مظبوط
وقِـع فيه كل ورق التوت
عشان فيـه قـَمْـع..
فيه جبروت
وفيه ضرب بالفلكة
وفيه لطش بالشلوت
فخـلـّى الحلم جوّانـا..
يعيش مكبوت
لكن لأه.. لازم نحلم
لازم نفهم
ونتكلم بأعلى صوت
ولو عاندنا
أكيد هـنفوت
ممكن مرة نتصادم..
وممكن مرة نتهاجم..
بس مش هنموت