ممدوح الحلو يكتب: "نَطْق الميّدَانْ "

بيقولوا عليه أسفلت وأنا اللى اتحملت

وشاهد على كل شىء حصل إن كان آسى ولا جَلّد

ولا عبادة ولا خوف من المجهول ولا عم أحمد المشلول

ولا يفطة مكتوب عليها إرحل يا ديكتاتور

شفت الدم على ضهرى سابح بحور

وإيد عزيز مقطوعة وماسكة فى إيد منصور

والدم يرسم صورة غالية فيها الهلال حاضن صليب

وصابر رافع العلم والصارى فى إيد وهيب

ويرتفع الآذان وترن الأجراس

والكل واقف يصلى جوه الميدان على ضهرى أنا

تسمع قرآن وترانيم الغفران

والخشوع على الوجوه رهبة زرعها الإله فى القلوب

والدموع على الصدور نازلة والإيدين مرفوعة للسما تقول يارب

والأمل نادا من بعيد يقول هانت اتحملوا يا شعب

اللى عده كتير والباقى صعب وقليل بس لازم من الصمود

دا الحرية ثمنها غالى إن كانت من دمى ولا من أرواح عيالي

وتكون عينينا كلنا على كل خطوة تتم

وأيدينا على الحدود جاهزة وحملة السلاح وتهم



العدو غدار والظالم غدره نار والشعب أخد القرار

يكمل طريقه للنهاية

مشوار الألف ميل بدا والمظلوم طريقه اهتدى

والشعوب قامت والحرية نادت علينا إحنا للمظلومين حنينا

وشعاع النور خرج لما البيان أتذاع وخرج علينا المشير

أمر الشعب دا مطاع لازم العدالة تتحقق

دا الثورة ثورة جياع للحرية والرغيف

ولشعب مبصر كفيف حط رجله على الطريق

زاد شعاع النور فى عينه شاف حقيقة ظلم حاكم

اتخدع فيه طول سنينه قال دا لازم يتخلع

ويبقى عبرة لكل جاى يلمح الكرسى بعينه

ينسى إن غيره جاي

نطق الميدان