سامح لطف الله يكتب: تنوَّر شمسها تانى

يا مر مررت البُق ومرك علقم
عشناك سنين طويلة ناكل ولا نهضم
نِمَلْوِشْ ولا نمضغ قبل اللسان ما يحس
ولما ييجى الزفت بعد المر نقول أطعم

***
ليلت يومنا بقى نهارنا يا ليل غامق
نصحى ننام نمشى ما عاد فارق
نجرى ورا اللقمة كما الكلاب تلهث
إبقاق جعانة وعطشانة تسطل الفايق

***
يا عمر عدى سنين وراها سنين
حسيتوا بيها زيى ولَّا انتوا مش حاسين
أصل الشقا على وشى بيعلم
تجاعيد عريضة مرصصة شمال ويمين

***
كلتوا لحومنا وسبتوا البواقى عضم
رمتوها ف الشارع نازلة الكلاب قضم
لملمها يا ربى يوم الحساب تنطق
فتفوتة فتفوتة أنينها يصحى الصم

***
لو نمنا ليلنا جوعنا يصحينا
بردك يفت العضم أملنا يدفينا
مين يا ترى راح يمسك الراية
لما الأوان ييجى الشهم هيجينا

***
لسه جنين فى بطن الأم لم يظهر
حاسس وسامع حزننا بيكبر
بيرضع مرنا عضمه يستقوى
عايزين لسانك وقلبك حصننا الأكبر

***
طلبنا فارس طلعولنا مليون فارس
طلوا ف يناير وكنت أظنها مارس
زهايمر حط فوق مخى مسح فايلاته
تلات أو سبت عقلى مش حاسس

***
يمكن من الفرحة أو حتى من الصدمة
معقول يا ناس هنخرج من العتمة
قلبى رقص جوة الصدر يتنطط
ولسانى بعد الصمت ينطق الحكمة

***
الله عليكم يا شباب وقتكم هيطل
وتزرعوا أرضنا بالقمح ويا الفل
ومصر الحبيبة تنور شمسها تانى
وخيرها الكتير راح يكفى الكل