مسموح لنا نمشى ف شوارعها القديمة
ونلم صحبة مدرسه
بالصدفه فى الثوره إلتقوا
مسموح كمان نتفرقوا
هما كدا سايبين لنا
حق إختيار الموته
أما الحياه ياه ع الحياه
طلعت صحيح حدودته
وتوته توته توته
سرقوا الثوره وسرقونا
وضحكوا علينا يا خال
والله دا شغل عيال
ومالاقى كلام يتقال
بزياده بزياده
ثورتنا ولاده
قهوتنا مش ساده
وعزانا فى الأبطال
يوم لما ترجع مصر
ويرحلوا الأندال
وهيرحلوا الأندال
مسموح لنا نكتب قصايد
ونغنى كام غنوه وهتاف
لأجل أما هنشوف إللى حاصل
ما نقولش حالة إختطاف
أيوه إختطاف
دا الأعمى شاف
أخر المطاف
بيساوموا ع الورد إللى مات
بيساوموا على دم الشهيد
وكإنه كان جاى إحتياط
هو الأساسى
وإنت الكراسى
خلوك تقول
أنا واد سياسى
وفاهم اللعبه الكبيره
> صدقنى دى الكلمه الأخيره
يا نجتمع يا نعيش مفيش
وهيرحلوا وهيُسجنوا
وهيُعدموا ولاد الئيمه
مسموح لنا نمشى ف شوارعها القديمه
ونلم صحبة مدرسه
بالصدفه فى الثوره إلتقوا
ممنوع كمان نتفرقوا
ممنوع كمان نتفرقوا
صورة أرشيفية
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة