عايزين رئيسنا الجى يكون
راجل موزون
واحد من الشعب المطحون
ودماغه تمام
الفول صديقه وسميره
والعيش بياكله بمساميره
ولما نطلب تغييره
يتنحى أوام
وتكون عيونه مليانة
ومراته حشمة وشبعانة
مش بايعة مصر وبايعانة
والفرد بكام
ويا ريت يكون ريسنا عقيم
ما يكونش إبنه أمين تنظيم
فاشل وعمره ما شاف تعليم
ولا فى الأحلام
ما يكونش سيس ولا محفلط
وبيتنطط
وف كل مشكلة يتورط
ويقول يا مدام
ما يبيعش غازنا لتل أبيب
وبعقد غريب
والشعب بيموت ع الأنابيب
ما يقولش حرام
عايزينه مصراوى مدردح
شاب ملحلح
فايق وفى الحكم مصحصح
مش جى ينام
ما يجيبش حواليه هتيفة
أو سقيفة
وبلطجية بتعريفة
زى الأفلام
عايزين رئيسنا يكون همة
وصاحب ذمة
مش جى يلبسنا العمة
واهو أى كلام
وخبرتو مع اخلاقو
راح يتلاقو
مش جى يعلم حلاقو
ف راس الأيتام
مايكونش سافر بالمرة
لبلاد برة
لا يجندوه ويصبح عرة
وسط الحكام
ويجيلنا بالفكر الغربى
المش متربى
ويلغى انتاجنا الحربى
وصواريخ قسام
عايزينه يمسح امريكا
بالأستيكا
مش يبقى تاجر بوليتيكا
وسيراميك حمام
ما يكونش دلوعة مامته
يخرب بلدنا على عظمته
واحنا نجوع قوى وفخامته
يشد لنا حزام
ما يكونش شرانى ف طبعه
يشهر صابعه
لا احسن يحصل فى صوابعه
سيف الاسلام
يلبى للشعب مطالبه
ويعرف واجبه
يراعى فى مصرنا ربه
بحلال وحرام
عايزين رئسنا يجمعنا
يرفع بلدنا ويرفعنا
مش بغبغان هيصدعنا
بكلام فى كلام
عايزينه خايف على نيلها
مش بس جى يغنيلها
وكل أخطاؤه يشيلها
وزير الإعلام
عايزين ولاؤه يكون لينا
ويعلينا
ما يكونش زى خوفو ومينا
آلهة حكام
ما يكونش قائد للطيران
ويا ريت يكون م الجيش هربان
ما يذلش الشعب الغلبان
قبل الإعدام
يحفظ لنا أرض جدودنا
يحمى حدودنا
واحنا هنمضيله عهودنا
ودمنا أقلام
لازم يحاكم أعدءنا
يخنق معانا اللى خنقنا
ويجيب فيلوس اللى سرقنا
بأسرع أحكام
وإن يوم غلط فى المصريين
نشكه محضر زى الطين
ونجرجره ونعمل له كمين
جوا الأقسام
