محمد حامد حسين يكتب: أنا واحد من الميدان

اهلا بيكم... اهلا بيكم
اول حاجة هاقولها يارب
يصلح حال مصر واحييكم
مش هاتكلم واقول انا مين
انا واحد من بين ملايين.
شوفت هناك اشكال والوان
اللى شهيد واللى مصاب
والى عاش عمره ورا الباب
جاى من بحرى ومن الصعيد
كلمة واحدة حلم واحد
مش خايف ولايوم هتاخد
بحلم زيك عيشة هنية
ورأسى فوق مش محنية
بقولها كفاية الكل معايا.
مصر بلدنا احلى حكاية.
قومنا بثورة.. ..ثورة لأء
مش طالبة أكتر من الحق
ضد الفاسد... ضد الظالم
كل نظام الفوضى الحاكم
كلنا واحد
هاتكلم وهاقول وهاقول
أنا مصرى مش حزب فلول
كانت غمة وخلاص هاتزول
مش هاسيب الثورة تتسرق
ولافتنة تخلينا نتحرق
أنا شارب من نهر النيل
مش هازهق لو ليلى طويل
انا هاكتب وهاقول مواويل
من غير ياليل من غير ياعين
أنا محمد أنا جرجس
مش فارقة مين فى الأتنين
مصريين..وطنيين..
مهمومين..فرحانين
من ثورتنا خافوا الملايين
أعدأنا اللى خربوا فلسطين
أنا واحد من الميدان
زى زيك حلمه الحرية
بكرافتة...بعمة ...وجلابية
من الزمالك ...من الشرابية
أنا مصرى ولاهابقى ضعيف
أنا بأحلم الأقى ليا رغيف
رغيف نظيف خالى من السوس
هايتحقق مش هايبقى كابوس
أنا عايزحق المساكين
أنا بحلم وده حلم بسيط.
أنا فلاح بأزرع فى الغيط
وهانزرع مصر الفدادين
ونصدر كده بالملايين
وهانغزل من توب مصرحرير
ونصنع أحلى البطاطين
والقطن هايتكلم مصري
مافيش مستوردأحنا نصدر
أحنا نقدر
أنا واحد من الميدان
أنا ياما نمت جعان
والمية باتت مقطوعة
مازهقتش ...وصحيت عطشان
أنا واحد بحلم بعروسة
وأنا جنبها قاعد فى الكوشة
لحياة حلوة ومدروسة
وبشقة فى مصر المحروسة
أنا واحد من الميدان
30سنة خلف القضبان
كله عليا كان غضبان
قومت وثورت وبايدى شاورت
وللحرية أنا أخترت
أنا واحد من الميدان
انا واحد شبعان من الخوف
بأتكلم مش بالمولوتوف
وطبيعى جدا فى حياتى
فى شغلى ..فى بيتي..فى صلاتي
أنا عادى جدأ. ومش هاسكت
لوفيها مماتي
أنا واحد من الميدان
أنا يوميا ليا سيجارة
مع الشلة وفى وسط الحارة
شوفت بلدنا فى لحظة هاتولع
دوست سيجارتى
قومت جريت
قولت دى بلدي. والله خسارة
قسمنا الاصحاب بالأسم
وقولنا هانحرص شوارعنا
جرجس... جامع.. احمد...دير
جاسر وهشام على القسم
قصدى دول يحرصوا فى القسم
أنا واحد من الميدان
أنا يوماتى فى التليفيزيون
عادي...شهرتى عدت نابليون
واخد حقى من الهليبة
وجبت فى ملعبهم 100جون
هيصولى .. باركولي
على الكتف شالوني
شوفت بعينى جيت أتكلم
أنا والكرسى بره رموني
أطلع بره..أطلع بره
أنا واحد من الميدان
أنا واحد اخويا شهيد
اتغدر بيه فى بورسعيد
شالوا من فوقه بوابة حديد
روحت أستلمه من المستشفي
سلمهولى فى كيس أسود
شوفت الاهمال واصل فين
كان أول من70
روح شوف امه بتعمل أيه
لابسة الأسود طول الليل بتنادى عليه
هوده ذنبه يشجع كورة. ولو مش ذنبه
الذنب لمين. ردوا علينا يا مسئولين
من الفرقة دايقين الويل
أنا واحد من الميدان
انا جاى اعبر وأكشف ناس
ولافى ضمير ولافى احساس
رتبتى عالية لكن مش هاقولها
قبل الثورة يجئ بكام يوم
بالتليفون صحونى من النوم
أحضر حالا بسرعة وفورأ
ماأتخرتش ...حاضر طبعا
روحت لقيت القعدة أتنصبت
والخطة أترسمت وأتحسبت
قولت فى أيه هاتعملوا أيه
نفذ فورا... خايف من ايه
وأحنا معاك ..هو بنفسه كمان وياك
دول عيال بسكوت فرافير
مهتمين بالفيس والشير
سيبهم فى الملعب ساعة
بعد المغرب لو مش هايمشوا
هناك بنزين ..واهى الولاعة
لما رفضت وقولت انا لا
خللى ضميرك يجيبلك حق
وأول واحد كنت هناك
وصادونى من ورا شباك
ومن يومها وأنا قاعد عاجز
.بس ضميرى دايما صاحي
دايما عايز وأقول لأ لا
أنا واحد من الميدان