د. هانى أبوالفتوح يكتب: فيكى إيه؟!

بسألك والحزن مين يقدر عليه
بعد طول الانتظار
مش تقولى فيكى إيه ؟
فيكى إيه مخليكى دايماً نور ونار
فيكى إيه يخلينا نصبر ع الشقا
رغم المرار
فيكى إيه لما نبعد ساعة عنك
نلعن البعد وسنينه
ياما فى البعد انتحار
فيكى إيه رغم هم الدنيا كله
دقيقة جنبك شفتها شمس النهار
.............................
فيكى إيه رابطنا بيكي
إنتى ساحرة وللا قادرة
وللا لون كحل ف عنيكي
فيكى إيه يخلينى أبيع العمر كله
وأشتريكي
..........................
فيكى إيه عرفيني
إيه اللى كان بينك وبيني
من و أنا صغير بحبك
حتى لو طلعتى عيني
حتى لو حزنك قاتلني
حتى لو قررت أبعد
حتى لو كان مين شاغلني
ليه بلاقى البعد خيبة
ولحظة القرب تغازلني
.........................
ليه وليه ألف ليه تسأل عليك
ليه بدوب فى شوارعك وف حاراتك
حتى فى الزحمة بحبك
وأرتوى بنظرة عنيك
ليه نشوف العيشة صعبة جنب منك
وأما اْلِفْ بْوِشِّى عنك
الدموع تهرب إليك
......................
فيكى إبه بس قولي
إنتى فيكى مغناطيس ؟
الكل عاشقك
حتى لو هيموت فطيس
حتى لو مخنوقة خنق
و إنتى محكومة ببوليس
حتى لو محروقه حرق
كل شعبك يستغيث
حتى وإنتى فى عز همك
وللا مخنوقة بسكوتك
كلنا بندوب فى حرف
لو نشوف بس صورتك
وللا نسمع بس صوتك
وللا إسمك وللا علمك وللا رسمك
كلنا نتمنى موتنا قبل موتك
..........................
الغريبة لسه دايما فيكى خير
شوفى ضحكة الغلبان
فى لقمة مقسوماله ويا طير
حتى لما أمشى ف شوارعك
وإنتى بالإيمان
بَانْيَة جامع جنب دير
..............................
عارفه أقولك فيكى إيه
مش فى غيرك
فيكى إسم ذاكرُه ربك
هو دا سر خيرك
........................
أيوة لسه فيكى خير
رغم جيش السراقين
فيكى نيل يجرى فى دمي
فيكى ناسى الطيبين
المحبة مش فى لقمة أو فلوس
المحبة فى النفوس
روح بتجري
بحر شوق لهفة و حنين
كل دول هما إنتي
مهما تبعدنا السنين
قُلتها بُعْدِكْ عذاب
يبقى مين هيلومنى مين
لما أكون دايب وداب
لما أكون عاشق خلود
حافظه رب العالمين
بإسم مكتوب فى الكتاب