وديع العلاوى يكتب: مين هو الأمير؟ٍ

كفاك يا مصر دموع
كفاك بهدلة وتكسير ضلوع
كفاك حرايق ونفاق الخلايق
وميوع الموضوع
-------
مسكينة إنتى يا حبيبتى
عُنتى ليه كده متنكدة
وكنتى متسيدة ومتبغددة
ومتفردة بأحلى الربوع
-------
حضنك الدافى الحزين
له سنين مستنى مين؟
مين اللى يقدر على مهرك؟
مين اللى قلبه ملان بحُبك
مين اللى يقدر يُسر قلبك
ويمسح الحُزن اللى هدك
ويبوس إيديك المنقوشين
قولى وربك مين؟
المرض اتمكن قوى
والضهر القوى بقى طرى
والطريق عاد ملتوى
ومش عارفين رايحين على فين
------
ماشيين ماسكين قلوبنا بإيدنا
بنشوف بلدنا بتروح قصادنا
والخوف واخدنا لخوف يبدنا
والأمن لسة مستكين
------
على الطريق واقفين شباب
بنياب ولا الذئاب
بيقتلونا كما الكلاب
ولادنا إحنا مش مأجورين
من طينتك يا مصر نابتين
مين اللى خلاهم كده
زى الوحوش المستأسدة
لدا ولدا واقفين
-------
فى الزنازين مساجين لئام
واضح ما بينهم الوئام
بيخنقوا شمسك يا بلدى بانسجام
والانتقام بانتظام بمال حرام
مال الغلابة المطحونين
--------
جوة المصالح والوزارات
بووم ببَرَق وحِدايات
بَلعِت اللى فات وباصه ورابصة للى آت
وبيقبضوا الملايين
وطظ فى أصحاب المعاشات
وطظ فى الشباب والشابات
اللى قاعدين عطلانين
--------
جوة المقابر ساكنين ولاد
الوش كرمش والقمل عشش
والشعر شاب قبل الميعاد
أطفال عرايا وصبايا جوعانين
نايمين صاحين خايفين
لابدين فى جدران السُكات
-------
تحت الكبارى أطفال حيارى
ع الأسفلت نايمين سكارى
متوسدين همومهم ملتحفين هدومهم
المتوسخين بدم البكارة
يا ميت خسارة
عليهم
وعلى اللى حالفين اليمين
-------
حنقول إيه وإلا إيه وإلا إيه
الواحد تعبت إيديه
والرأس بقى كُراس وسواس
من كُتر ما فيه
---------
قُلنا النفاق حلو المذاق
وقُلنا الفساد المستفاد
وقُلنا أمراض العباد
وقُلنا الخوف وأمن البلاد
وقُلنا الرشاوى وكل البلاوى
وقُلنا عيشة المقابر ونسينا المجارى
وقُلنا الجوع وتكسير الضلوع
وقلنا أطفال الشوارع
والكل شايف وسامع
وقلنا البطالة القتالة
ونسينا الزبالة الشغالة
والحلول المُحالة
ونسينا الكوسة اللى رجعت مهووسة
ونسينا العنوسة والبنات المتعوسة
والرغيف أبو سوسة
المحروق قلبه على قمح الفلاحين
ونسينا الجاسوس إبن الجاسوسة
والدولارات المدسوسة
ونسينا البانجو والمخدرات
ونسينا الأسعار وإيجار الدار
والمظاهرات والاعتصامات المشتعلة
والأزمات المفتعلة ليل نهار
يعنى انفلات على كل المحاور والجهات

----------
يعنى تركة بجد بِركة أررها بير
وبرده لسة يا مصر حلوة كتير
حلوة وفيكى عبق واللى خلق كبير
بس مين هو الأمير؟ مين هو الأمير؟
اللى يقدر على مهر الجميل
-------------------------------