فيسبوك
واتساب
ثورة شعب داق المُر لاجل يعيش يوم حُر
ضحى بزهرة عُمر شبابه علشان يبنى مجد بلاده
يزرع نبض أمل فى قلوب ماتت من جبروت حكامه
يمكن يجى اليوم ويشوف حلمه بيكبر يوم قدامه
يلقى طريق مرسوم من نور يدى الرايه فيه لولاده
ويبقى حاكمنا واحد منا ويرسى بينا فى يوم على بَر
ثورة شعب داق المُر لاجل يعيش يوم حُر
زرعو سنين فينا الخوف سجنو ولادنا جوا كهوف
حتى الفكره ماتت فينا زى المركب من غير مينا
أقصى أملنا قوت اليوم ولو صَرَّخنا مصيرنا كفوف
وهبت نفسها للسجان نسيت إنى فى يوم إنسان
حقى أطالب .حقى أعيش إنى يكونلى لقمة عيش
لكن رب الكون علام عينه لا تغفل ولا بتنام
أيقظ فينا روح الوحده وزى ماقال الظلم ظلام
زاد فى عنادهم ـ أعمى قلوبهم واستبسلنا واتمسكنا يرحل عنا
زال الهم .رحل الظلم لكن يبقى لكل ظلام رماد وركام
وطول ما محمد فى ايدين مينا ها تقوى بلادنا دايما بينا
نرسم فجر جديد لولادنا ينعمو بيه دايماً احفادنا
لكن بردو ياوطنى الغالى مهما تآمرو هاتفضل عالى
نجوم الليل دايماً بتلالى وسط ظلام تدينا أمانى
ومهما كنت مسلم ـ قبطى،علمانى ـ ليبرالى،يمينى ـ يسارى،سلفى أو اخوانى
هاتبقى المصرى قاهر كل ظالم وأنانى
ياولاد بلدى مطلوب دستور
يبنيه كل فئات الشعب يكفل حق أى مواطن إنه يعيش حر ومستور
أحلى تحيه للثوار نبض الامه الأحرار
رمز صمود الشعب المصرى ولشهداءنا الأبرار
وراح تبقى يامصر أبيَّه قلب الوحده العربيه
طول ما الخير موجود جوانا يروينا نيلك بالوطنيه
وهاتبقى يابلدى امانه نروى ترابك بدمانا و نحميكى من كل شر
لاجل نخلد ثورة شعب داق المُر علشان يبقى دايماً حُر
صورة أرشيفية
