وديع العلاوى يكتب: غلط كبير

الشعب فاهم كل حاجه
الشعب مفهوش سذاجه
الشعب دا أذكى شعب
بس يخرج م الزجاجة
غلط كبير قوى قوى
لو عاملتوه كالغبى
الشعب جواه نبى
كالنجوم الوهاجه
غلط كبير ويمكن عبط
لو تفهمونا غلط
فيه ثورة قامت قضت
على نظام آخر سماجه
ثورتنا لسة فى الميدان
فى أجراس الكنايس فى الأّذان
لسة الثورة قايده نار
فى نفوس الأحرار
فى اللى راكع فى اللى ساجد
فى اللى بيبيع الخُضار
وبياع الشبارولعييبة القمار
فى اللى ببنى فى الجدار
فى اللى ببذرحَب قمح
يحول الصحرا إٍخضرار
فى اللى سايق وسايل عرق جبينه
جوه عينه اللى مليانه إحمرار
فى اللى راقد فوق سرير الإحتضار
وعنده أمل يطلع عليه النهار
غلط كبير لو قلتوا مَضت
أو إنتهت أو إنزوت أو إنحنت
الثورة لسة دايره فى المدار
الثورة صاحيه فى كُلنا
للى ناوى يذلناٍ
للى ناوى بالبلاوى يعِلنا
الثورة وضعت بذره نار
وغلط كبير لو تستهينوا
بشعب مؤمن بدينُه
شعب كاتب فوق جبينه
الإنتصار
غلط كبير لو قولتوا طيب
الشعب دا عنده القلب
مليان بحُب
لكن فى لحظه تلاقوه شرار