كل ثورة وانت طيب
قالها مش عارف بيشمت
ولا كان قاصد يطبطب
بس صوته ساعتها كان لليأس اقرب
قلت : وضّح
قال : شعاع الشمس زى ماجه مروّح
قلت : وضّح
قال: ضلام الليل ماهوش قادر يصبّح
قلت : والدم اللى سال ع الارض هان
قال : ماتجادلشى
اوعى تخلط جنة الرحمن بدنيا ماتتفهمشى
الكلام عنك وعنى
عن بشر عايشين حياتهم ع التمنّى
كل مذاهبهم سكك من غير رجوع
مش دا اللى حاصل ؟؟؟
زى طير بالوهم بيعبّى الحواصل !!!
قلت : تقصد مين ياعمى ؟
قاللى : كله
أى عود معووج هيفرد امتى ضلّه ؟
قلت : حدد
قال : مفيش فى الضلمه أى طريق محدد
قلت : حدد
قال : إذا زاد الضباب إياك تسدد
قلت :انا عايز أمل مش تريقه
قال: مفيش طرح ف أراضى مشققه
اسلاميه قالوا والاسلام برىء منهم يا إبنى
كدبهم فاضح لسان حاله (مفيش حد يحاسبنى )
دافريق..
والتانى فى الضلمه استخبّى
وامّا (على بابا ) مشى ..كوّش وعبّى
واللى يهتف ليبرالية ليبرالية
أسأله آخرتها يتهكم عليا
واللى فوق الكل ماسك خيط عرايس
فهلوى الليله الكبيره واسمه حارس
يبقى مستنى الصباح من اى ناحيه
من فساد الذمه.. ولا من التسيب ؟؟
كل ثورة وانت طيب !!!!!!!!!!!!!
صورة أرشيفية
مشاركة
اضف تعليقاً واقرأ تعليقات القراء
مشاركة
