يااللى مرشح نفسك رئيس
لمصروعايز تقعد عريس
على كرسى الرياسه ياريت لو نجحت
تصونها وتبقى عليها حريص
ياريت بعنايه تختار بطانه
يكون عندها إنتماء وأمانه
مايكونش همها مصالحها الشخصيه
وبأد إيه من مناصبها هتطلع كسبانه
ياريت كمان تعين حكومه
تعاملنى كإنسان وتكون مهمومه
بحالى وحال كل الناس
اللى عاشت سنين ف بلدها مظلومه
ياريت تطهر البلد م الفساد
اللى إنتشر ف كل حته فيها وساد
وياريتك تقضى ع الروتين
اللى بقى ف حياتنا شىء معتاد
وياريت تقدملى إقرار بذمتك
م الأول يبينلى ثروة حضرتك
عشان الأمور تكون واضحه من البدايه
ونعرف نتحاسب أخر مدتك
ياريت كمان تهتم بالتعليم
وتبدأ من تانى على أساس سليم
تحط مناهج تطلع أجيال
تفيد بلدنا مثقفين
ياريتك تهتم بالصحه
عايز لو جالى حتى دور كحه
ألاقى علاج على أعلى مستوى
وبالحب بلدى أحضانها ليّا فاتحه
ياريت كمان تراقب الأسعار
وتشدد عقوبة الإحتكار
وتزود المرتب اللى يادوب بيكفى
شروة كيلو لحمه وحبة خضار
يااللى مرشح نفسك رئيس من أولها
لو حاسس إن المسؤوليه مش هتقدر تشيلها
ياريتك تنسحب من دلوقتى
وتاخد بعضك وتمشى من قصيرها.
صورة أرشيفية
مشاركة
اضف تعليقاً واقرأ تعليقات القراء
مشاركة
