يا مفصلين للبلاد
ف الهنا دستور
افتكروا أخوكم
بتوب م القماش كستور
ولا حته بفته
أو سروالين دمور
أدارى بيهم عوره
متعرضه للنور
إعملوا حسابى ف أوضه
ولا حيطه ف وسط الدور
تأوى جنابي
وعيال ف عمر زهور
رجعوا لنا الميه تسرح وتمرح
فى قلب النجوع وكفور
تروى سنابل تخضر
تطرح لنا ف بدور
لمصنع ينسج وينتج
بدل اللبان كستور
ارحموا شعب م البلا
والفساد مقهور
ينام من غير عشا
ويصوم قبل الصيام بشهور
اكرموه..
ولا يفوت لكم البلاد ويغور
ولا يخلل فيها..
ويلبس مع الفساد طرطور
ياعم يا دستور..
ساوى بين الخلايق
تكون عند الفقير مشكور
نبوس ف إيد المعالى
ونركبك حنطور
تتيه ف وسط الخلايق
بزفه كما الشهبور
يا عم يا دستور..
عازمك معايا ع الغدا وفطور
برغيف معجون ف نيله
وغموس بطين مكمور
الحلو ميه مجارى
متزينه بكلور
ياعم يادستور
نفسى أعيش ف الأمان مستور
بعد الهوان والمرار
وسيد قرار مسرور
البسمه ترجع لى تانى
تسعد قلوب وثغور
واللى مايحمل ف المرار همى
يسيب المكان.. ويغور
مجلس الشعب
مشاركة
اضف تعليقاً واقرأ تعليقات القراء
مشاركة
