أبدأ نهـارى زى ضـوء الشـمس
ماسـح بأستيكة همـوم الأمـس
أغسـل سـنانى وأتوضا
أخشـع أصلى ركـعتين الصـبح
ألبس قميص أبيض وافتح الراديو
يصفعـنى أول خبـر
حكم البـراءة ع الطبـيب
اللى كـشف ع العذرية
تنزل على راسـى مدوية
بالعـافية أطـلع م الصـدمة
أرمى جسـد منهـك
ف أول طابور للعيـش
وبلدنا مزنوقة لسنين بين الجهار والشيش
بتفوت ساعات وبسيفه يقـتلنى الملل
أتصفـح الجـرنال
بيهـزنى زلـزال
مانشيت بالخط العـريض
ببراءة الضـابط
اللى قتل ثوار يناير
أخرج هـدومى مبهدلة
أحتار فى فهم المسألة
يسألنى ماسح أحذية
تمسـح ؟
قلت له يمسـحها إسـود
ينقذنى صـوت الأذان
الله أكبـر
أكـتم ف غيظى وادخل الجامع أصلى
بعد الصلاة يدعى الإمام
يارب تحشرنا مع الصابرين
رديت أميـن
العصـر بعد الغدا
وف قهـوة أخر الشارع
أسمع طراطيش الكلام
والصخب مالى المكان
عن هروب الأمريكان
وسمعت كلمة خضـوع
كلمة معونة وركـوع
وسمعت سيل م الأسئلة
أمتى وفين وإزاى ؟
سديت ودانى وإحتسيت الشاى
قررت أرجع بيتى وأستسلم
أرفع راياتى البيضا
جوة العقار شقة لأم شهيد
أخطف ف رجلى بسرعة ع السلم
أستغبى وأعمل نفسى مش سامع بكاها
أفتح كالون الشقة بالمقـلوب
أسمع رئيس للوزرا م العهد القديم
بيقول كلام أحتار ف تفسيره
أو حتى تأويله
بالقوة أطفى التليفزيون
ما بينطفيش
أخر النهار بتمشى جنب النيل
أشكـيله همى ويشكـيلى
أمسـح دموعه بمنديلى
بتعدى بياعة زهور
وردة يا بيه ؟
والورد أهدى لمين
قالت لحد عليل
قلت أشترى بستان ورود
أهديه لمصـر
يامصر كل الورد علشانك
صورة أرشيفية
مشاركة
اضف تعليقاً واقرأ تعليقات القراء
مشاركة
