سيد قراره رجع بغلاسته ورزالتــــــــــــــــــــه
ودخل علينا بمعيزه وجحشه وحمارتــــــــــــــه
اتارى ( سرور ) كان زمان ارحم وكان اجمــل
فقيه فى علم القانون وقاريه بنضارتــــــــــــــــه
......
سيد قراره رجع ارزل مــــــــــــــــــــــن الاول
وربى دقنه ولسه فيها بيطــــــــــــــــــــــــــــوّل
وعمل كلام حضرته على اهلنا قـــــــــــــــــرآن
والوقفه عنده نـُُسك وفى الغرور غــــــــــــــــوّل
......
وقالوا سيد قراره فصل الدستــــــــــــــــــــــــور
ودلعه ولبسه العمه والطرطــــــــــــــــــــــــــور
وهشكه وبشكه واخده على حجــــــــــــــــــــــره
بيقولوا طبطب عليه وكان مطفى النـــــــــــــــور
......
بيقولوا لسه كمان هايشبعه تهشيــــــــــــــــــــــك
ودبحله فردين حمام وهايحشيهم له فريــــــــــــك
وفوق سرير حضرته هاينيم الدستــــــــــــــــــور
بيقولوا جاب له كمان كام بطانيه شيـــــــــــــــــك
......
وانا بصراحه كده خايف على الدستــــــــــــــــور
ومش مآمن عليه ضابط ولا مأمـــــــــــــــــــــور
دا لسه عضمه طرى وخايف يجوروا عليـــــــــه
وسيد قراره غشيم فى الكار بقاله شهــــــــــــــــور
......
وداعى سيد قراره للفرح خمسيـــــــــــــــــــــــــن
وداعى للزفه عشره وللطهور عشريـــــــــــــــــن
وداعى عشرين كمان يسقفوا حواليـــــــــــــــــــــه
ماهو اصل سيد قراره حزين بقاله سنيـــــــــــــــن
......
آمانه يا ولاد شوفولى سيد قراره فيــــن
وعلموه القانون فى دار اصول الديــــن
ودقنه دى تتحلق وماشوفش فيها شعـره
ولو رفض كتفوه وارموه مع المساجيـن
......
سيد قراره عشان صابر بقاله مـــــــــده
كتب كتابه ودخل وبهيه فى العــــــــــده
ياما نفسى دستة بُـلغ وانزل بنفسى عليه
ويكون عددها كبير فيها متين فــــــــرده
مجلس الشعب
مشاركة
اضف تعليقاً واقرأ تعليقات القراء
مشاركة
