نزيه الحكيم يكتب: انتخبوا الرئيس!!

يلى نويت تنتخب ريس يكون معقول
حيرت نفسك كده ما بين شلل وفلول
صدعت نفسك ومخك محتاج شريط بنادول
تختار مرشح دكر واخدها عرض وطول
يجعل عيشتنا زفر منشفش تانى الفول
ويظغطط المسئله ويبغدد المسئول
يعلن جواز الأربع من غير ما حد يقول
ضره وظالمنى وسايبنى وقاعد هناك على طول
وحريمنا ترضى بكده ويبقى النقاش مقفول
واياكم اسمع نفس يقولى مش معقول
طول ما الرئيس منتخب هيكون أكيد معدول
لا يبيع بلدنا لبلد ولا يسرق المحصول
ولا يبقى فيه سمسره ووراه قلل وديول
ولا يبقى فيه فشخره ولا اقتصاد مشلول
ويكنسل المسخره ميسيبشى دول على دول
ميكونش لزقه بغرا ويقولى مش منقول
ولا يشتغل مرتشى ويكون خرع مذلول
يلغى اتفاق الغاز وضريبة المحمول
يلغى تجارة البشر لا كفاله ولا مكفول
يرفع جينه البلد ويبقى ليه مفعول
وشبابنا يلقى الفرص يبقى العمل موصول
والعيش يجيلنا البيوت ويبقى ولد أصول
وعلاجنا يبقى بلاش م الكشف للمحلول
رئيس يكون واقعى وكلامه مش معسول
دكتور ويفهم بلد محتاجه أيه على طول
ويحترم ثورتى راجل ومش دلدول
ويحترم نشأته وميخلفشى الأصول
يكشفلنا المختفى ويعرفلنا المجهول
دم الشهيد لو هدر يبقى عليه مسئول
مسئول امام ربنا عن كلب لو مقتول
يبقى الكلام منتهى وعارفينه قد القول
وصوتنا ليه اتحسم مادام رئيس معقول