خمسين فى المية م المجلــــــس وكمان خمسين من أحبابـــــــه!
م المجلس ياما بكره نشــــــوف إيه لسة مخبى فى جرابـــــــــه؟
يا خساره يا حزب الإخـــــــوان أديتك صوتى وندمــــــــــــــــان
أنا بكره هاروح أسحب صوتـى والمجلس يقفل أبوابــــــــــــــــه
......
لجنتكوا لأجل الدستــــــــــــــور فيها صوره من (فتحى سرور)
وملامح (صفوت) و(شهاب) ورزالة (عز) المغــــــــــرور
وكمان مجلسكم معطـــــــــــوب علشان ماشيين بالمقلــــــــــــوب
وقلعنا العمة ولبسنـــــــــــــــــــا فى جمال أيامكم طرطــــــــــور
......
ما تجيـبوا كمان المخلــــــــــوع مش فارقه وياكوا كتيــــــــــــــر
ويركب دقن ويصبغهــــــــــــــا بالمره لزوم التغييـــــــــــــــــــر
وأهو أحمد يبقى الحاج أحمــــــد ونبدل بطرس بمحمـــــــــــــــــد
والاسم اللى مايعجبكـــــــــــوش يفارقكم من غير تفكيــــــــــــــــر
......
المجلس والأخ (كتاتنـــــــــــى) المخلص أبو قلب كبيـــــــــــــــر
فاكرين إن مافيش غير همــــــــا اللى بيفهموا فى الدساتيــــــــــــر
وكأن مافيش مستشاريـــــــــــــن ولا حد بيفهم فى الديـــــــــــــــن
وكأن مافيش ألف فقيــــــــــــــــه فى الجامعة وفى غيرها كتيـــــر
......
مجلسكم اسم الله عليـــــــــــــــــه الناس بيقولوا مشكوك فيــــــــــه
يعنى على كف العفريـــــــــــــت ممكن فى دقيقه يرميــــــــــــــــه
وف ثانيه يتشقلب حالـــــــــــــــه وساعتها نشوف حد بدالـــــــــــه
والعيب اللى أنتوا كشفتــــــــــــوه مش هايلاقى حد يغطيــــــــــــــه
......
أنا قايل ف قصيدة زمــــــــــــــان أنا كنت بحب الإخـــــــــــــــــوان
لكن بصراحه عمايلهـــــــــــــــــم هاتجيب لى فى العقل جنــــــــــان
وإذا قالوا عدالة وحريـــــــــــــــة راح أقول فيها قرع وتقليــــــــــة
وهايزرعوا مصر المحروســــــة كوسه وتقاوى بدنجــــــــــــــــــان
صورة أرشيفية
مشاركة
اضف تعليقاً واقرأ تعليقات القراء
مشاركة
