د. هانى أبوالفتوح يكتب: أمى

أول لمسة مين؟
أول صِدْرْ أول رَضْعة
أول شوق وحنين؟
أول ضَمْة رغم بكايا
جَاى بِألمْ وأنين
....................
كل الدنيا ساعتها ف وادى
رغم عذابها وقت ميلادى
رغم تعبها جَاىْ بَنَادى
مين ويايا حيران؟
مَرَّة مريض تعبان
أو بالليل سهران
مَرَّة تِرَضَّعْ مَرَّة تِغَيَّر
مَرَّة تِضُمْ
دايماً ألاقى صِدْر الأمْ
بحر دفا وحنان
علشان كده وِفْ عيدها
جَاىْ حافظ مواعيدها
زَى ما وصَى المولى عليها
وآيات القرآن
.....................
أمى..
كلمة حروف من نور
مهما راح أكتب فيكى حروف
ولَّلا أَعَبى سطور
مهما أحبك مهما أدعيلك
عمرى ما أْوفِى جميلك
لو أشيلك على راسى وأدُوُرْ
جُوة ف قلبى رغم البعد
حافظة العهد
مهما تْفَرق بِينْنَا الدنيا
و يكون بْينَّا بحور
صورتك دايماً قدام عينى
ومحروم منك
حتى ف سنك
وقت البرد ووقت الضَلمة
إنتى الدفا والنور
......................
وأما بجيلك
قلبك بيكون فرحان بيننا
وطَايرْ طِيرْ
ولَّلا ولادى
لما يغنوا وبصوت عالى
مالناش غيرْ
حتى وهما صغار عاشقينك
فاكرة زمان بَدِّلوا إسمك
بأم الخير
وإنتى الفرحة مش ساَيعاكى
بَمْشِى معاكي
نضحك نفرح فرحة تاخدنا
مهما يْطَّوِّل بينا السير
.......................
ياه عَالْدنيا وعلى حلاوتها
وعلى فرحتها فى عيد الأم
وِسْطْ ربيع و زهور جَايِّين
والخير جَاى و يَّاك بِيْعُمْ
مع أغانيك الحلوة نغني
وكل البيت حَواليك يِتْلَّمْ
يِكفى الجنة تحت أقدامها
يبقى نِبُوسْها إِيد و قَدْمْ
...................
تبقى الغالية حبيبتى مين؟
قولوا معايا ست الكل
وبندعى لها قولوا آمين
وبنهديها ورد وفل
ربى احفظها
ويْطُولْ بيها العمر سنين
تبقى ف عيدها
زى عروسة لابسة التُلْ
آى والله
لابسة التُلْ.. لابسة التُلْ