د.صبرى إسماعيل يكتب: حبيبتى يا أمّى

يِهون العمر يا أمّى ,, ولا تهونى
تهون الصرخة فى صدرى
وإنتى برضه ماتهونى
وجوّه الحِلم بالقاكى أمل بكرة
وجوّة القلب ما انساكى ولو ذكرى
وأسمع كِلمتك أسرح
وهمسة لمستك تِفرح
ياساكنة جوة فى دمّى وشريانى
وإسمك كان سبب سعدى فى بستانى
سعادة اكبر من الدنيا من الأحلام
وانا طاير ولا عصفور
على صدرك حبيبتى أنام
****
ولا يساعنى جميع الكون
إذا عنِّك فى يوم قدرى يفرقنّى
واصير فى الدنيا ك المجنون
إذا مِنِّك فى يوم قاسى ب يسرقنى
وليه أبعد! مادام الحب عنديكى
وليه ارحل! مادام الجنة فى شرعى
مِرابطة تحت رجليكى
ياست الكلّ يا أُمّى
ياشايلة همِّنا وهمّى
دامهما الدنيا تِبعدنى
هاعود لدفاكى يا أمّى
هاعود لدفاكى يا أمّى