حمدى نصر يكتب: شعارات المرشحين للرئاسة أشكال وألوان

بعد أن تم فتح باب الترشيح للرئاسة لكل من يحمل بطاقة رقم قومى، تدافع العشرات إلى اللجنة المسئولة عن ذلك ليعرضوا استعدادهم لممارسة حقهم المشروع فى المريسة، وقد كشفت بعض وسائل الإعلام التى تتسابق كعادتها فى البحث المثير والجديد غير المفيد، لعمل لقاءات مع المرشحين المحتملين، وسألتهم عن برامجهم وشعاراتهم، وقد اخترت لكم بعض هذه الشعارات وردود الأفعال لتعرفوا مصر رايحة على فين.
- خالتى أم شمورت .. إللى بتزغط البط كسب وتحلف بالنعمة والعيش والملح وحياة أولادها و أولاد المشترى إنها بتزغطه فول مش مسوس كمان.

- أم شمورت هانم أعلنت: أنها رشحت نفسها تحت شعار: "ريشة لكل مواطن" علشان المواطن المصرى يبقى ماشى فى الشارع منفوخ وعلى راسه ريشة، لأول مرة فى حياته.
- "ست عيلتها".. ست بيت قالت: إن شعارها الانتخابى "طبق محشى كرنب لكل مواطن يخليه زى البومب". وسيتم توزيعه فى الإجازات الرسمية فقط تجنباً لحدوث حالات إغماء وزكام.
- وأكد بليه الباش سمكرى فى حارة خالتى بمبه: إنه قرر ترشيح نفسه بعد خلع الأسطى سيد صاحب الورشة، وأكد أنه يتضامن مع ست عيلتها حفاظاً على صحة المواطنين، وأعلن عن وصول شحنة شكمانات جديدة توزع مجاناً للراغبين من المواطنين وعليها كاتم صوت، ومصفاة للروايح غير المرغوبة.
- صبرى صابر عبد الصبور، أعلن عن ترشيح نفسه بعد خبرة 14 سنة فى الصف الثالث الإعدادى، وأوضح أن شعاره الانتخابى: أستيكة لكل مواطن لمحو أمية أولاده من الابتدائية إلى الثانوية، وقال: أن أول قراراته سيكون إلغاء المرحلة الإعدادية لأن الطلاب بيسوسوا فيها حسب تعبيره.
- شوقى أبو سنارة حكم كرة قدم دولى، فور إذاعة نبأ ترشحه، أبدى إعلامى رياضى فى برنامجه :كلنا بنكره الحكم شوشو، ومحدش بيطيق يبص فى وشو،، فأبو سنارة هبلة مسكوها صفارة. وتساءل بغيظ: هزُلت.. عشنا وشفنا الحكم الفاشل الفاجر الظالم المنحاز الضلالى الذى يفشل فى تحكيم مباراة يتجرأ ويترشح لحكم البلد؟،وأعلن: دى فضيحة صريحة، وطالب اللجنة الانتخابية برميه فى الأوت، وعدم السماح له بالتسلل لحكم مصر، ولابد أنه ياخد كارت أحمرمن البلد كلها فوراً، ومش كده وبس، لازم ياخد ضربة جزاء على قفاه، واضحة وضوح الشمس.
- فرارجى قال: انتخبونى فى العشة تجدونى، واللى مش حينتخبنى حانتف ريشه، وليلته بيضة.وحخليكو زى الفراخ تناموا من المغرب.وشعارى الانتخابي: كتكوتين حلوين لكل أسرة كافيين عشان نحارب زيادة السكان. اللى بقالنا سنين عليها مش قادرين.
- عواد مزارع باع أرضه ليترشح للرئاسة، قال:إن أول قراراته ستكون : تسكير القنوات الفضائية، عشان الترع المعفنة بقت أنضف منها، وسيكون شعاره الانتخابى: " بصلة لكل مواطن". لأن بصلة المحب خروف.
- مرشح خريج جامعة طرة ، اللى مش حينتخبنى على النعمة لكون راقد له فى الدرة.
- أبو بلطة.. بلطجى متفرغ، قال: أنا حفتح مقر انتخابى على الدايرى لوحدى، والجدع اللى مش عاجبه يورينى خلقته علشان افتح المقر فى نافوخه. وبمناسبة ترشيحى ولأنى راجل شعبى بعد فوزى حيكون النشيد الرسمى للرئاسة الأغنية الشعبية القديمة لفرقة البونى ام:( Your money or your life). حتنتخبوا ميين؟!!.ياللا صوتوا فى التعليقات عشان نعمل قياس الرأى العام زى العالم ما بيعمل.