سيد أحمد الهمشرى يكتب:هادفع قرشين وهانتصالح

عايز أسرق زى المخلـــــــوع والآخر تبقوا تحاكمونــــــــــــــى
اسرق مصنع ولا اتنيـــــــــــن كام سنه والآخر حاسبونــــــــــى
هاديكوا قرشين م اللى كسبتــه وكمان قرشين م اللى سرقتـــــــه
فى الآخر هاطلع كسبــــــــــان وبراءة وبشكل قانونـــــــــــــــى
......
اذا كان ( المغربى ) هايصالـح وهايدفع من جيبه قرشيــــــــــــن
و( اباظه ) ابو خمسين محلـــج هايضحى بثمن متريــــــــــــــــن
واخونا ( ابراهيم سليمـــــــان ) راح يدفع كام قرش كمـــــــــــان
انا عايز اعمل زييهـــــــــــــــم وألغوّص فى الفته يوميــــــــــــن
......
واتساوى ب ( علاء وجمـــال ) و( نظيف ) والناس اللى طـــوال
واتملعن من نفسى يوميــــــــــن وافضل فى الازرق شغــــــــــــال
وادبح واسلخ زى ( العادلــــى ) واعمل من نفسى يومين شوضلـى
انا اصلى مفروس من مـــــــــده ومشتاق للمشى البطـــــــــــــــــال
......
مدام الحراميه هاتتصالـــــــــــح بقانون اصلاح الحراميــــــــــــــه
وهايخدوا براءه بقرشيــــــــــــن من غير ما يكون فيها قضيـــــــــه
انا هاخطف وكمان مش هاجرى ماهى مصر انفتحت ع البحـــــرى
اسرقها والغوّص باليـــــــــــــــل واطلع م القسم الصُبحيــــــــــــــــه
......
مدام البطيخ صيفى وشتــــــــوى والقرع بيطرح قوانيــــــــــــــــــن
والعدل تقاوى بدنجـــــــــــــــــان فى قانون القرن العشريـــــــــــــن
اسمحلى انى امشى مشلـــــــــــح واشتم اهاليكم واقبــــــــــــــــــــح
وموافق بكره تودونـــــــــــــــــى الصبح سراية المجانيـــــــــــــــــن
......