فيسبوك
واتساب
كل شىء فى المزاد ..
إلا أونا ..إلا ترى..
مصر بتتباع يا ولاد!!
واللى يقدر يشترى..
أهلا بيه.. ومرحبـــا
واللى يقدر يشيل..
ربنا يبارك له.. حلال عليه!
هيئة للاستثمار .. تقول
البيع حل مثـــــالى
يخلصنا من مؤسسات مديونة
وشركات خسرانة..
وبنوك مفلسة..
وعماله مقنعة..
ما بتسألش إلا على المكآفات..
والأرباح والعلاوات!!
وشغل ما فيش..
وإنتاج ما تلاقيش!!
أصلهم متثبتين!!
مش خايفين!
مطمنين .. ومريحين!!
المهم يثبتوا حضور..
فى كشف الحضور الكرام
الإنتاج مش مهم!
الجودة دى مش عـ البال!
والتسويق فى خبر كان!
أطنــــان .. أطنــــــان..
مليه المخازن المكتظة!
لحد ما تتلف وتبقى خردة!
تباع لأصحاب النصيب المعروفين!
حاجة ببلاش كدة..
والنتيجة خساير وديوان
وعمالة.. زى الهــــــم
قاعدة على قلب الحكومة العليل
وشركات خاصة..
شغاله زى الفل..
عملة دعاية بالليل والنهار
فى كل الجرايد والمحطات!!
منتجاتها بتلمع.. وشكلها جنان!!
لكن جواها ايه؟!!
ما احنش عارفين!
ولا حتى دريانين!
سمنة وزيت.. ياسلام
جبنه ومربى فى السندوتشات
والكل مبسوط ..
ما دام الطعم لذيذ
استر يارب على البنى آدمين!!
ليه الحكومة تبيع الشعب !!
تشتغنى عى شراكاتها!
تبيعها برخص التراب
للمستغلين.. المتربصين!!
ويبقى الاحتكار..
سيف على رقاب العباد!
ينفض الجيوب
ويذل المحتاج
يقصم ضهر العويل..
ويخلى الناس تمد إيديها
للســؤال !!
لكل طيب وخبيث
تنمى الحقد فى النفوس
بين فقرا معدمين
واغنيـــا .. متريشين!!
يصير بعدها ..
شرخ فى مجتمع المصريين
فى إيدينه نمنعه يا مسئولين!!
قبل ما يقسمنا
ويخلينا متشتتين!
شركات الحكومة دي..
أمان لينا .. وللمسئولين!!
لما يكون الضمير صاحى
ونتقى ربنا فى المعدومين!
الغلابــــــة.. المحرومين..
تتحكم بيها الدولة
فى سوق قلبه حديد
ما يعرفش غير لغة المكسب السريع
الفاحش ... المجير
وتقطع بيه إيدين المحتكرين!
ترحم بيه عباد الله الشقينين!
ويصير للحكومة كلمة مسموعة
وسطوة مستنيرة!
تدعم فكرة الأمان والاستقرار
فى مجتمع المصريين
تحفظ وحدتهم.. وانتماءهم
لتراب الوطن العزيز..
صورة ارشيفية
