الشعب لسه يريد ومابطلش كلام
وعامل اضراب وكمان اعتصام
دى الظاهر طلعت موضة
ومش هانطلع يوم اودام
دى حتى الست مراتي
قالبة عليا حماتي
قال ايه عاملة اعتصام
عايزة تزود مصروفها
مع انى عارف بظروفها
شاكيانى لده ولده
وطفشت منها ضيوفها
هاتقسم شغل البيت
هاقعد انا بالرضعة
وهى تروح الغيط
الشعب لسه يريد
بنعطل ليه اشغالنا
لو نهدأ هايرتاح بالنا
والكل يقول عقبالنا
الثورة دى مكسب ياما
والعالم خدنا علامة
مع بعض نهد السور
وقريب جاى النور
واحدة واحدة هانتقدم
وناسيين ليه العبور
المصرى ده طيب وصابور
معروف بنظامه العالي
واى طلب بالدور
ثورتنا هاتفضل ناجحة
وفى اى مجال اهى فاتحة
والشعب ده طلبه مجاب
فاتحين كل الابواب
ومصر هاتفضل مصر
مهما يحاولو الاغراب
مايروحوا يشوفوا بلادهم
يدوا الدرس لاولادهم
فاكرين قال ايه بنقلدهم
المصرى ده لغز كبير
بيحل العقدة الجامدة
ولابيهموا التشفيير
بأشارة هايقف تاني
ويجيب هو التغييير
المصرى مايرضى هوان
بقوته 1000حصان
بيهز الدنيا بكلمة
ويسد فى اى مكان
المصرى ده كله تاريخ
فى اى زمان تلاقيه
بيعمر كل الدنيا
من زحل للمريخ
الشعب ده هو الوحدة
والكلمة دى معنى الوحدة
و اما بتطلب روقان
بيرقصلك على الواحدة
المصرى ده دمه خفيف
لايهمه لاشتا ولاصيف
معروف بكرمه الزايد
ويرحب قوى بالضيف
المصرى هيفضل مصري
شياكة وراجل عصري
كلمته فى البيت مسموعة
مالوش فى اللف ودوغري
ولوهافضل اقول مش هاخلص
ولاعمرى كلامى هايخلص
ويا ريت مانقولش خلاص
ولانقول ونعيد
ولاعايز اسمع انا تانى
الشعب لسه يريد
إضراب - صورة أرشيفية
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة