مش عايزين الريس
بلكيمي علينا يميس
ولا عايزينه متحمس
في الآخر يبقي فاشوش
مش عايزينه يهلل
ويقولنا هعمل واعمل
ويرص كلام ويدلل
في الجد ما نلاقيهوش
***
مش عايزين كلامنجي
لعيب أستاذ مزاجنجي
ويقول دانا شنجي برنجي
وحسابه ماتفهمهوش
***
مش عايزينه جبار
يحكم بحديد أو نار
ويقول دانا إبن الكار
وينسي فقير مرووش
***
مش عايزين الطالح
واللي مقضيها مصالح
والوش دامنه كالح
يا ما شفنا منكو وشوش
***
مش عايزينه تعالب
مكار وف قلبه مطالب
ما يردش أبداً طالب
الوش ضحوك وبشوش
***
جريئ وقراره من مخه
أوباما ما ياخده ف فخه
يدرس رأيه ويطخه
ما يبيع بلده بقروش
***
لو فاهم مني الحالة
رشح نفسك وتعالي
واقفين ويَّاك ببسالة
والمحترفين ما يجوش
***
مش عايزين الريس
كداب وعلينا يميس
يعاملنا بصبر كويس
هنشيله وعنه نحوش
سحب أوراق الترشيح للرئاسة
مشاركة
اضف تعليقاً واقرأ تعليقات القراء
مشاركة
