محمد حامد حسين يكتب: واحد اتنين الأزمة الجاية فين

الأزمة الجاية جفاف أو عربية إسعاف والداية الحاجة عفاف
وهانرجع نلبس خيش مش هانلقى رغيف العيش
الأزمة فى كل طريق على طول حاسين بالضيق
وميمون القرد اتجنن بيقول شوف لى دقيق
واحد اتنين الأزمة الجاية فين
الأزمة الجاية مواصلات وكمان التليفونات ويقطعوا الحرارة
ولو تشكى سرقوا الكابلات
الأزمة الجاية فى نت والغنا والرقص كمان ولا على الطبلة ولا التيت
ويا خوفى على الواد والبنت
الأزمة فى حوض النيل والحصة هاتبقى ها.. يادوبك يشرب فيل
واحد اتنين الأزمة الجاية فين
الأزمة الجاية الصحة مش هانلقى علاج للكحة
والأدوية تصبح شحة
وكمان يتقطع النور واللى مش عاجبه يغور
واحد اتنين الأزمة الجاية فين
باتكلم أنا وبهاتى دى الأزمة الجاية مراتى
من كتر الأزمات لينا قللت المصروف ليها
ولا أسرق أنا وأديها
الأزمة الجاية البروتين اشمعنى الجاز والبنزين
وهايوصل بينا الحال مش هانلقى نشيل الطين
الأزمة الجاية جواز مش هالحق أجهز بيتى لوحتى بلمبة جاز
الأزمة الجاية فى تربة مش هانلقى المتر فى متر وهاتبقى الأوقات صعبة
أنا راجل صاحب أسرة خمس أفراد منكسرة
والقبض يدوب بيكفى وبكمل شهرى بسلفة
واحد اتنين المسئولين راحو فين وعدونا ويخلفوا
وميت مرة يحلفوا بكرة نحلها بكرة نحلها
إحنا فى عصر الأزمات ولاحد فى يوم يدينا الكل يقولك هات
واحد اتنين الأزمة الجاية فين