فيسبوك
واتساب
كل الحيطان متشققه فيك يا وطن
صابك من الثلاثين سنة شىء م العفن
خفافيش يطيروا وسطنا وبينسجوا خيط الكفن
وبيظهروا بشكل البرىء اللى بيبيكى ف العلن
يستنسخوا الطيبة فى وسط البلطجه
وبيحبسوا الشعب الفقير ف الشرنقة
ونعيش نخْوْن بعضنا ويعيشوا دور المسكنة
وكأننا مش حقنا نصرخ ونتغير بقى
ليه بالطمع تخسر بلدنا كام بطل
وإن الخيانة والفساد بقى محتمل
والكل طمعان فى الكراسى وف الفيلل
فيه شىء غلط جوه النفوس عامل خلل
وهقولها من غير فلسفة عايزين أسد
يحكم بعدل وفلسفة دين البلد
ويخلى باله من الفقير اللى اتولد
واحميه لينا من شر حاسد إن حسد
مصر فى رباط قالها الرسول من كام سنة
محفوظة من شر العيون محسومة هى المسألة
متلونة بلون الربيع مهما الخريف يوم ابتدا
هى الفصول الأربعة زارعة الأصالة فى أهلنا
وطنى على مر العصور ياما اتسرق
مماليك رومان أو جيش تتار أقروا الورق
عشنا فى مهانة والحياة جهد وعرق
بس اللى بيقرب لأرضى بيتحرق
النيل
