حمدى يوسف يكتب: إشطة.. صباحك ورد

عند رصيف الجامعة
وتحت الكوبرى نايم، صاحى
شايل موسى جوا ف حنكى
وحاطط تحت دماغى سلاحى
أقرا ل جوته وشحته وعنتر..
أما ثقافتى.. تحت السلم
أو سهران مع فيلم إباحى
لابس شورت ويا فانيلة
والبرنيطة سعر سياحى
أفطر إشطة صباحك ورد
أما عشايا.. نوم صباحى
تحت الكوبرى كل أصحابى
سنجة ومشرط ويا بلاهة
وأخويا الماحى
الميزانية شغل عباطة
ويا بارومة باعيش أفراحى
أكتم همى تحت جناحى
وابنى قصور جوا ضواحى
وساعة الأزمة..
أصرف جزء من أرباحى
لجل عيشيتنا تحت الكوبرى
تبقى كلاس.. مش بس سياحى
عايش فرحى كلى سعادة
دايما أسأل فين أتراحى!!
دعوة لكل فقير محتاج..
ييجى يشَتى هنا ف جناحى
ياخد جولة ويا عباطة وأخويا الماحى
وأما يخلص.. ياخد نسخة من مفتاحى
لجل أريّح أهل بلادى
عايش ساكت ويا جراحى
نفسى ف أوضه تلّم حياتى
لجل أقول للجتة ارتاحى