حمدى يوسف يكتب: ممكن تغازلها!

صعب مِراسها بس ...
تشفى جنابك م الأوجاع
ترضى فقير أو واحد
عمره ما جاع
ترضى الشارى
ويا التاجر والبياع
تِرضى بعيشتك
حتى إن كانت ربع متاع
تملا بخيرها ملو ذكيبة
وتكفى الصاع
إن فكرت ف يوم تخاصمها
أو تكسبها لوى دراع
تاخد كل الرزق معاها وتنفّضْ لك
زى العاشق لو يوم باع
تسعد بيها لما بتاكل حتة جبنة
ويا زتونة وربع بتاع..
تِهنا وتسعد بيها
مهما ساءت بيك أوضاع
هى بعينها...
تتعس فكر لئيم طمّاع
لو يحايلها أو يغازلها
تدب ف عينه ألف صباع
أما الخامل يسعد بيها ويعمل إنه
ف بنك الحظ ما لوهش إيداع
تسمع منه كلمة راضى
يقولها زى حبيب ملتاع
حاطط فردة صرمة ف حنكه
ويزعل لما تقوله ما ليش أطماع
إنك تربح أو تتمرجح
أو تتعشى بلحم نخاع
ولا راح أحزن لما هتبقي
ف وسط أحبابنا م الأنطاع
أو تترقى وتبقى
ف قلب الفتة شجاع
ننشر فيها يخلق أو نزرعها
تبقى ف قلب الخلق مشاع
خصلة جميلة أنك تبقى
راضى وقانع....
مهما ضاقت بيك أوضاع