إمام سلام يكتب: مصر يا بلد العجايب

هِنا الميدان هِنا الميدان
هِنا الميدان أرض الرجال
هِنا اتولد أجدع عيال
هِنا الميدان أرض النضال
هِنا بنات زى الجبال
هِنا الكرامة والجمال
هِنا القنابل والغازات
هِنا بندقية ورشاشات
هِنا كام شهيد
على أرضه مات
هِنا وطن بيتوَلد
هِنا هقف زى الوتد
هِنا الميدان
احكى علينا يا زمان
احكى عن الدم اللى سال
احكى عن الحلم المحال
رحيل رئيس كان يا مغيث
احكى عن اللى مات شهيد
لما لبس توب العريس
هِنا فى الميدان وقع كريم
وجنب منه مات لويس
هِنا فى الميدان وقفوا ستار
يحمونا من غدر الخسيس
هِنا كان شاويش وعسكرى
وسط الميدان بيفترى
هِنا سف قدامنا التراب
هِنا وشه كان متعاص هباب
هِنا فى الميدان كان البوليس
فاكر هنهرب م الرصاص
اصحوا بقى وفوقوا يا ناس
خلص خلاص زمن الكلام
خلص الخنوع و الشعب قام
هِنا فى الميدان
القهر ما عادلوش مكان