فيسبوك
واتساب
فـوق كـوبرى قصـر النيـل
لما الرصـاص كان اخـتبار
شـفـتك فى أول صـف
واقـف وطاوى الموت بكف
شـايل همـوم الـوطن
من غـير مزايدة
من غـير شعارات البطـولة
بالاخـتصار كان الشعار الوطن
حلمك تـشوفه زى ما تمنيت
مش تـورتـة متـقـسـمة
إخـوان وعـسكـر
فـوق كـوبرى قصـر النيـل
لما الـرصاص كان شبر فوق الروس
أو شـبر تحـت الروس
الخـوف ساعـتها إنداس
اسـتبدلوه بإحسـاس
إن الـوطن أصبـح بتاعـنا
أصبح حياتـنا وموتـنا له معنى
يـفتح ضميـر الثورة كـراسه
يحفـر سطـورها بإحساسه
سـجل حاجات مفهمـتهاش
لكن شهيدنا فهمها واتبسم
معـرفش ليه كان متبسم
يمكن عشان الكوبرى كان خالى
م الإخوان وم العـسكـر
فـوق كـوبرى قصـر النيل
لما الرصاص كان الوسيلة
يقـتل بشايـر حلمـنا
كان خلق نايم ف تعـسيلة
وكـأنهم مش مننا
واقـفيـن يراقبـوا الموجة
وبيحسبوها بالقـلم والمسـطرة
وبـيوزنوها بالمكاسب والخسـارة
الثـورة مش حصـة حسـاب
مش رجل جوه ورجل بره الباب
الثورة حلـم بـيـتـفجّـر
من غير ما نغـرق فى الحسـابات
من غير ما نعـقد فى الصفـقات
من غير التورتـة ما تـتـقسم
إخـوان وعـسكـر
كوبرى قصر النيل
