يعيش الملك المفدى يعيش
قطة يا بطة يا حادى وبادى
يفطر قشة عسل وزبادى
أنا مش لاقى الفول لولادى
ساكن قصر شاليه فى معادى
ألفين عزبة وفيلا ونادى
بالع قوتى قلع أوتادى
بيقول دخلك يبقى زيادى
نلقى الفقر علينا ينادى
ضابط نفسى وعايش هادى
ماشى سواح ولحنى ودادى
سالب ناهب منى بلادى
ناكل ملح وجبنة قريش
يعيش الملك المفدى يعيش
عاطل باطل قافل باب
شادد وش وشعر ما شاب
حاكم بلده لسه شباب
سابنا تنهش فينا كلاب
يخطب عمره ما كان كداب
بكرا هتاكلوا معايا كباب
شفنا صحن الفول أهو داب
واحنا علينا اللوم وعتاب
قاصف قلمى جريدة كتاب
رشوة فشاد ولا أى حساب
ويلكم بعدى لو طيفى غاب
شفتوا بإيدى كل خراب
عايز يزعق فيها غراب
عايز شعب مايلقى تراب
حلم بلدكم يبقى سراب
كل الفرحه تبقى مافيش
يعيش الملك المفدى يعيش
يظلم يسجن فيَّا وابنى
يهدم حلمى كل ما أبنى
أحكى أشكى كلامه غالبنى
ماسك فيـَّا كإنه خاطبنى
حالى ومالى وعمرى سالبنى
ابنك وارث جاى وناهبنى
بتقول ربى عليك يحاسبنى
تصبح ناهب قوتى غاصبنى
تلاتين حزن الحكم يصبنى
شيبة وهيبة وحاكم خيبة
مهما العيبة مايستحيش
يعيش الملك المفدى يعيش
غَنـِّى اهتف يا نشيد
مصر فرعونها الوحيد
خلا دلتا تكون صعيد
بكرا أسوان بورسعيد
حطنا فى قيد من حديد
صار ميلاده لينا عيد
خط فقر معاه يزيد
قوت مسرطن بالمبيد
سارق يقول حاكم رشيد
بس شعبى يا ناس عنيد
دخلنا باسمه رصيد
مهما ينهب هل مزيد
قوت ولادى نار تقيد
كل مصرى إيد فى إيد
يبقى إمتى نكون عبيد
دا الشعب لمَّا يوم يريد
يتحقق الحلم الفريد
هارينا شاوينا مارينا عريش
يعيش الملك المفدى يعيش
حُب الوطن قالوا جنون
جايب جراد يسرق يخون
لابس قناع بألف لون
الناس بتشرب بالكوبون
فاتح كمان لينا سجون
خلونا نعشق بالسكون
جامع رصيد غالب قارون
فوق السرير قلد شارون
والست هانم حيزبون
الشعب عاف حتى الصابون
الشك ثورة أو ظنون
الفوضى بعدى أو أكون
الشر فيه كل الفنون
دم الشهيد عنده يهون
قناص بيضرب فى العيون
هز النخيل طرح اللمون
وفى كل حتة من حارتنا
وفوق سريرى جوا بيتنا
ألف صورة وميت أفيش
يعيش الملك المفدى يعيش
بيب بيب توت توت
واكل حقى وبالع حوت
يسرق يحرق فينا سكوت
خلا مواطن عاش هلفوت
يهتف ليا بعالى الصوت
ماشى حافى مالاقى القوت
حلم حياتنا صبح مكبوت
قال الشعب وديع كتكوت
لؤلؤ وكنوز فيروز وياقوت
ألواح خشخاش خدها العفروت
غاسل مخى فكرى يموت
تدفع تبصم تمضى تفوت
وتلقى الوظيفة وفرخة بريش
يعيش الملك المفدى يعيش
قط فار تعلب مكار
رئيسنا خلا الكون عمار
عاش المواطن ازدهار
فساد يلعلع انبهار
رغم الشنب بصبح عشار
زارع لجوعنا غيطان فشار
بايع نجوعنا بالدولار
مانع رجوعنا للمسار
نعشق ترابك يبقى عار
والمخ لف جميع مدار
تلاتين خريف من غير نهار
خيرك بلدنا ماليه غبار
خبـِّى الجريمة بماس شرار
بينى وبينه ألف تار
يقتل شقيق يضرب حصار
العزْ و ِز الطبلة طار
حتى المجارى احتكار
دا النهر شهد وصار عكار
فوق كل مكتب ع الجدار
نلقى المبارك كالمنار
الشعب قالوا عليه حمار
ملايين بتهتف قال هزار
دخل الوطن دا شئ بخار
متغاظ يا جحش معاك بحار
حق المواطن اختيار
نظام عظام وكلاب تتار
عشايا غم هموم فطار
سالب ناهب هج طار
مركب غريق وحريق قطار
القرض يهرب من مطار
التمر جمر وخمر بار
ندفع ضرايب ع العقار
حتى الكفن ختم الشعار
تحلم فى نوم عايز قرار
مصير حصير يصير مزار
أوضه موضة عريس محتار
عش يا دش ودش ونيش
يعيش الملك المفدى يعيش
صورة أرشيفية
مشاركة
اضف تعليقاً واقرأ تعليقات القراء
مشاركة
