طارق عليان يكتب: خـاين

اللى يشـوف مصلحـته وبـس
خاين
حاطط مصـر ف خانة بعـيدة
نمـرة اتـنين أو نمرة تلاتة
باصـص ع الثـورة بمنـظوره
هـو وبـس
رتب أوراقـه وكشـكوله
وبمنطـق تاجـر
شـاف الثـورة مربع مكـسب
ومربع قابل لخسـارته
ومربع قابل يتـفاوض فيه


اللى يـبيع الثـورة
خاين
اللى يلـون حلـم الثورة رمادى
ومخبى جـردلين بوية
من مخزن قـديم
ويشـوه ف وشوش الثـوار
ويلونهـا بألـوان باهتـة
يضـرب أهداف الثورة ف خلاط
ويشـكـكنى ف طعم الثورة

اللى يـبيع الـدم رخيـص
خاين
اللى يـبادل دم شـهيد
بمكـاسب من تحت الترابيزة
يعـقد صفـقة ف ليل ماشـفوش
الصبح أدفع ف التمن خرطوش
كام مـرة خطـيت فوق دمى
وما خدتـش بالك
كام مرة رصيت الجثـث
ووقـفت فوقـها

اللى بـيحلم حلم صغيـر
خاين
بيحط حلمى بين قـوسيـن
ويدبسه بدبـوس إبـرة
وبطـوبة فوقه يمنعه ما يطـيرش
يفرش بضـاعته ع الـرصيف
ويـبيع لأول مشـترى
الحـلم مش للـبـيع
الحـلم جوه القـلب يكـبر
يرسم وش الـوطن كـامل
مش نص وش